एमाले अध्यक्ष ओलीको गृहनगर भत्काउन राप्रपा अध्यक्ष लिङ्देनले गरे गठबन्धनसँग तालमेल, दमकको मेयरमा थापा

११ वैशाक दमक । राप्रपा अध्यक्ष राजेन्द्र लिङ्देनले सत्ता गठबन्धनसँग चुनावी तालमेल गरी एमाले अध्यक्ष केपी शर्मा ओलीलाई गृहनगर झापाको दकम नगरपालिकामा चुनौति दिएका छन् । ओलीको निर्वाचन क्षेत्रमै राप्रपा बलियो मानिन्छ ।

राजेन्द्र लिङ्देनले नेतृत्व गरेको राप्रपाले गठबन्धनको चुनावी तालमेलमा सहभागी बन्दै नेकपा एमालेका अध्यक्ष एवं पूर्वप्रधानमन्त्री ओलीको गृहनगर दमकमा राप्रपाका प्रदेश १ अध्यक्ष राम थापाले नगर प्रमुखको टिकट पाएका छन् । राप्रपाले मेयरसहित दुई वटा वडाध्यक्ष पाउने सहमति भएको छ ।

नेपाली काँग्रेससहितको गठबन्धनबाट थापा नगर प्रमुखमा र माओवादी केन्द्रका नेता गगन पुरी उपप्रमुखको उम्मेद्वार बनेका छन् । यसभन्दा अघि भएको पहिलो स्थानीय तहको निर्वाचनमा नगर प्रमुखमा राम थापाले दोश्रो र गगन पुरीले तेश्रो स्थान पाएका थिए । नगर प्रमुखमा नेकपा एमालेका रोमनाथ ओली विजय भएका थिए ।

दमकमा राप्रपामा राजनीतिक हैसियत दोश्रो ठूलो दलको रहेको छ । अघिल्लो निर्वाचनमा नेपाली काँग्रेस र माओवादी केन्द्रले नगरपालिकामा कुनै पनि वार्डमा नजिते पनि राप्रपाले दुईवटा वडाध्यक्ष जितेको थियो । गठबन्धनले राप्रपालाई ती जितेका दुई वटै वार्ड छाडेको छ । वडा नं. १ र ७ राप्रपालाई नै छाडेको हो । ती दुई वार्डमा पुरानै वडाध्यक्ष उठ्दै छन् ।

राप्रपालाई प्रमुखसहित दुई वटा वडा, माओवादीलाई उपप्रमुखसहित दुई वटा वडा र काँग्रेसलाई छ वटा वडा तथा जसपा, नेकपा एकीकृत समाजवादीलगायतका दलहरुलाई वडा सदस्य तथा कार्यपालिकामा मनोनयन गर्ने गरी सहमति भएको बताइएको छ ।