गठन लगत्तै संसदीय समितिले दियो महानगरका उम्मेदवार छान्ने अधिकार सभापति देउवालाई

११ वैशाख, काठमाडौं । उम्मेदवार छनोटमा सहमति नभएपछि नेपाली कांग्रेसको केन्द्रीय संसदीय समिति (बोर्ड) गठन भएको छ । आइतबार स्थानीय तह निर्वाचनका लागि घोषणापत्र सार्वजनिक गरिएलगत्तै बसेको केन्द्रीय कार्यसम्पादन समितिको बैठकले संसदीय समिति गठन गरेको हो । समितिमा १३ पदाधिकारीबाहेक रामचन्द्र पौडेललाई मात्र राखिएको छ ।

स्थानीय तह निर्वाचनमा महानगरपालिकाका प्रमुख र उपप्रमुखको टिकट वितरण गर्ने अधिकारप्राप्त संसदीय बोर्ड झन्डै अधिकांश टिकट वितरण गरिसकेपछि गठन भएको हो । वरिष्ठ नेता रामचन्द्र पौडेलका अनुसार महानगरपालिकाकै टिकट टुंग्याउन नसकेपछि संसदीय समिति गठन गरिएको छ ।

कांग्रेसको. विधानानुसार महानगरको टिकट वितरण गर्न संसदीय समिति गठन गर्नुपर्ने हुन्छ । कांग्रेसको विधानानुसार केन्द्रीय संसदीय समिति २५ सदस्यीय हुन्छ । आइतबार सानेपास्थित केन्द्रीय कार्यालयमा बसेको केन्द्रीय कार्यसम्पादन समितिको बैठकमा सभापति देउवाले केन्द्रीय संसदीय समिति गठन गर्ने प्रस्ताव गरेका थिए ।

विधानअनुसार पार्टी सभापति नै संसदीय समितिको सभापति र महामन्त्री संसदीय समितिको महामन्त्री रहने व्यवस्था छ । सभापतिले बढीमा ११ जना सदस्यलाई मनोनीत गर्न पाउने भएपनि देउवाले केन्द्रीय संसदीय समितिमा वरिष्ठ नेता रामचन्द्र पौडेलको नाममात्रै मनोनयनका लागि प्रस्ताव गरेका थिए ।

त्यसपछि लगत्तै केन्द्रीय संसदीय समितिको बैठकले ६ वटा महानगरपालिकाका प्रमुख र उपप्रमुख पदमा पार्टीका उम्मेदवार छान्ने जिम्मा सभापति देउवालाई दिएको छ । सहमहामन्त्री जीवन परियारले संसदीय समितिको बैठकले उम्मेदवार छान्ने जिम्मा सभापति देउवालाई दिएको जानकारी दिए ।

विधानअनुसार संसदीय समितिले उम्मेदवारको टुंगो लगाएर केन्द्रीय समितिबाट अनुमोदन गराउनुपर्ने व्यवस्था छ । सभापति देउवाले तीन देखि उम्मेदवार छान्ने विषयमा शीर्ष नेताहरूसँग छलफल गर्दै आएका थिए । तर, आइतबारसम्म पनि त्यसको टुंगो लागेको छैन ।

उम्मेदवार चयनबारे पार्टीभित्र सर्वसहमति नहुने भएपछि संसदीय समितिले सभापति देउवालाई अधिकार दिएको हो । अब सभापति देउवाले नेताहरूसँग परामर्श गरेर उम्मेदवारको टुंगो लगाउने र मनोनयन पत्र दिने तयारी छ ।

स्थानीय तह निर्वाचनका लागि आइतबार देखि नै उम्मेदवारको मनोनयन सुरु भइसकेको छ । सत्ता गठबन्धन दलहरुबीच चुनावी तालमेल हुँदा कांग्रेसले काठमाडौं, ललितपुर र विराटनगरको प्रमुख तथा भरतपुर, वीरगन्ज र पोखरा महानगरपालिकाको उपप्रमुख पद पाएको छ ।