आज उम्मेदवारी मनोनयन दर्ताको अन्तिम दिन, उम्मेदवारको नामावली प्रकाशन पनि आजै

१२ वैशाख, काठमाडौं । निर्वाचन आयोगले स्थानीय तह निर्वाचनमा सहभागी दलहरुलाई उम्मेदवारको मनोनयन दर्ताका लागि दिएको समय आज साँझ ५ बजे सकिँदैछ । आइबार र सोमबार गरी दुई दिन मनोनयन दर्ताको समय दिइएको भएपनि आइतबार थोरैले मात्र दर्ता गराएका छन् ।

मनोनयन दर्ताको अन्तिम समयमा आइपुग्दा पनि दलहरुले उम्मेदवारको अन्तिम टुंगो लगाउन सकेका छैनन् । सत्ता गठबन्धनको नेतृत्व गरिरहेको नेपाली कांग्रेसले अझै सम्म उम्मेदवार टुंग्याउन सकेको छैन ।

आइतबार छुटेका दल तथा स्वतन्त्र व्यक्तिहरूले रित पु¥याएर आज मनोनयन दर्ता गर्न पाउनेछन् । देशभरका ७५३ स्थानीय तहको प्रमुखदेखि वडा सदस्य पदसम्मका लागि दलगत र स्वतन्त्ररुपमा समेत मनोनयनपत्र दर्ता हुनेछ ।

७५३ मध्ये ६ वटा महानगरपालिका, ११ उपमहानगरपालिका, २७६ नगरपालिका र ४६० गाउँपालिका छन् । यी सबै तहमा प्रमुख÷उपप्रमुख तथा अध्यक्ष÷उपाध्यक्ष र सदस्य पदका लागि मनोनयन हुनेछ । मनोनयन दर्ताको काम सकिएपछि आजै साँझ उम्मेदवारहरूको नामावली प्रकाशन गरिने कार्यतालिका रहेको निर्वाचन आयोगले जनाएको छ ।

साना दल र केही स्वतन्त्र उम्मेदवारहरूले आइतबार नै उम्मेदवारी दर्ता गराएका छन् । निर्वाचन आयोगका अनुसार आइतबार १०५३३ जनाले उम्मेदवारी दर्ता गराएका छन् । तर, ठूला दलहरूमा आन्तरिक किचलो र गठबन्धनमा भागबन्डा नमिलेका कारण पहिलो दिन उम्मेदवारले मनोनयन दर्ता गराएका छैनन् ।

उम्मेदवारी दर्ताका क्रममा आचारसंहिताको पालनामा आयोगले राजनीतिक दलहरुलाई आग्रह गरेको छ । तोकिएको उम्मेदवारी मनोनयन दर्ताको पहिलो दिन १० हजार ५३३ जना उम्मेदवारले मनोनयन दर्ता भएका छन् ।