निर्वाचन आयोगले विभिन्न दलले पेश गरेको समानुपातिक बन्दसूची संशोधन गर्दै

१२ वैशाख, काठमाडौं ।  निर्वाचन आयोगले निर्वाचनमा सहभागी विभिन्न राजनीतिक दलले पेश गरेको समानुपातिक प्रणालीतर्फको बन्दसूची संशोधन गर्ने भएको छ । आयोगले दलहरुले प्रतिनिधिसभा र प्रदेशसभाको समानुपातिकतर्फ पेश गरेको बन्दसूचीबाट नाम हटाउन अनुरोध गरेकाले यस्ता नाम हटाउने भएको हो ।

समानुपातिकको बन्दसूचीमा रहेकाहरुको नाम नहटाएसम्म उनीहरु स्थानीय तह निर्वाचनमा उम्मेद्वार हुन नपाउने व्यवस्था छ । समानुपातिक सूचीमा रहेका तर स्थानीय तहमा उम्मेद्वारी दिन रुचि देखाएकाहरुका लागि दलहरुले बन्दसूचीबाट नाम हटाइदिन निर्वाचन आयोगमा अनुरोध गरेका थिए ।

निर्वाचन आयोगका अनुसार, आइतबार अपरान्हसम्म विभिन्न १३ दलले पटक–पटक गरी सूचीबाट उम्मेद्वारहरुको नाम हटाउन अनुरोध गरेकाले नाम हटाउने निर्णय गरेको आयोगले जनाएको छ । बन्दसूचीबाट नाम हटेपछि मात्रै उनीहरुले निर्वाचन अधिकृतको कार्यालयमा मनोनयनपत्र दर्ता गर्नेछन् ।