कांग्रेस संसदीय समितिको बैठक बालुवाटारमा, तीन महानगरमा सहमति जुटाउने प्रयास जारी

१२ वैशाख, काठमाडौं ।  नेपाली कांग्रेसको केन्द्रीय संसदीय समितिको बैठक बालुवाटारमा जारी छ । स्थानीय तह निर्वाचनमा महानगरपालिका मयेर र उपमेयरको उम्मेदवार चयनका लागि कांग्रेस संसदीय समिति बैठक चलिरहेको हो ।

प्रधानमन्त्रीको सरकारी निवास बालुवाटारमा एक घण्टा अघि सुरु भएको समिति बैठकमा काठमाडौं बाहेक सहमति जुटेको छैन । आइतबार संसदीय समिति गठन गरेको कांग्रेसलाई आज उम्मेदवारी टुंगो लगाउनै पर्ने बाध्यता छ । आज मनोनयन दर्ताको अन्तिम दिन हो ।

उम्मेदवारी दर्ताको दोस्रो दिनसम्म पनि कांग्रेसले उम्मेदवारी टुंगो लगाउन सकेको छैन । शुक्रबारदेखि महानगरपालिकाको मेयर उपमेयर छान्न शीर्ष नेताबीच छलफल भएपनि सहमति जुट्न नसकेपछि उम्मेदवार छनोटमा ढिलाइ भएको देखिन्छ ।

काठमाडौं महानगरपालिकाको मेयरमा सिर्जना सिंहको नाममा सहमति जुटेपनि विराटनगर र ललितपुरको उम्मेदवारबारे कुरा मिल्न सकेको छैन ।