उपमेयर दिएर भरतपुरमा एमाले गर्यो राप्रपासँग तालमेल

१२ वैशाख, चितवन । नेकपा एमालेले राष्ट्रिय प्रजातन्त्र पार्टी (राप्रपा)लाई उपमेयरसहित दुई वडा दिएर भरतपुर महानगरपालिकामा चुनावी तालमेल गरेको छ । महानगरको मेयरमा एमाले र उपमेयरमा राप्रपाले उम्मेदवार उठाउने गरी दुई पार्टीबीच सहमति भएको हो ।

भरतपुरमा एमालेले मेयरमा उठाएको व्यक्तिलाई राप्रपाले समर्थन गर्ने र उपमेयरमा राप्रपाले उम्मेद्वार उठाउने सहमति भएको हो । त्यस्तै वडा नम्बर १५ र २६ को वडाध्यक्ष पनि राप्रपाले पाउने भएको छ । ४,११,१६,१९ र २४ नम्बर वडामा दुवै पार्टीका उम्मेद्वार रहने र मित्रवत प्रतिस्पर्धा गर्ने निर्णय भएको छ ।

सत्तारुढ गठबन्धनबाट मेयरमा नेकपा माओवादीकी रेनु दाहाल उठ्ने पक्का भइसकेको छ । त्यस्तै कांग्रेसले उपमेयरमा चित्रसेन अधिकारीलाई उम्मेदवार बनाउने भएको छ । अधिकारी महानगर कार्यसमितिका सभापतिसमेत हुन् । भरतपुरको मेयर माओवादीलाई दिएको भन्दै चितवन कांग्रेसमा तीव्र असन्तुष्टि देखिएको छ ।