मनोनयन दर्ता गराउने सबै उम्मेदवार साँझ ५ बजेभित्र लाइन बस्नुपर्छः आयोग

१२ वैशाख, काठमाडौं । निर्वाचन आयोगले सोमबार साँझ ५ बजेसम्म उम्मेदवारी दिन लाइन बसेकाहरुको मात्रै मनोनयन दर्ता हुने जनाएको छ । तोकिएको समयभित्र लाइनमा नबस्ने दलसँग आवद्ध वा स्वतन्त्र कसैले पनि मनोनयन दर्ता गर्न नपाउने आयोगले जनाएको छ ।

सोमबार धेरै मनोनयन दर्ता हुने अनुमान गर्दै आयोगले अपरान्ह ५ बजेसम्म मुख्य निर्वाचन अधिकृतको कार्यालय परिसरमा प्रवेश गर्नेलाई मनोनयन दर्ता गर्न दिने भएको हो । काठमाडौं महानगर लगायत विभिन्न निर्वाचन अधिकृतको कार्यलयमा अहिले मनोनयन दर्ता गराउनेको भिड देखिएको छ ।

निर्वाचन आयोगले मनोनयन दर्ता गर्न चाहनेले सोमबार अपरान्ह ५ बजेसम्म सम्बन्धित जिल्लाको निर्वाचन अधिकृतको कार्यालयमा प्रवेश गरिसक्नुपर्ने भनेको छ । ३० वैशाखमा हुने स्थानीय तह निर्वाचनमा ३ लाख भन्दा बडी मनोनयन दर्ता हुने अनुमान गरेको छ ।

सोमबार दिउँसो २ बजेदेखि मनोनयन दर्ताको चाप बढेको छ । अपरान्ह पाँच बजेसम्म लाइनमा बसेका सबैको मनोनयन दर्ता गर्न लागेको हो । आयोगले सोमबार साँझ अबेरसम्म पनि लाइनमा बसेकाहरुको मनोनयन दर्ता भइरहने आयोगको भनाई छ ।