टिकटको विषयमा सभामुख सापकाेटाकाे क्षेत्र चौतारामा माओवादीका दुई पक्षबीच झडप

 १२ वैशाख, काठमाडौं । सभामुख अग्निप्रसाद सापकाेटाकाे निर्वाचन क्षेत्र समेत रहेको सिन्धुपाल्चोकको सदरमुकाम चौतारामा टिकटको विषयलाई लिएर नेकपा माओवादी केन्द्रका दुइपक्षीय कायकर्ताबीच झडप भएको छ ।

झडपलाई नियन्त्रणमा लिन प्रहरी समेत परिचालन गरिएको छ । दुवै पक्ष तोडफोडमा उत्रिएपछि स्थितिलाई नियन्त्रणमा लिन केही राउण्ड अश्रूग्याँस पनि प्रहार गरिएको छ ।

चौतारा माओवादी नेता अमानसिंह तामाङले स्थानीय आवश्यकताका आधारमा भन्दा पनि काठमाडौंमा बस्नेलाई टिकट दिएपछि झडप भएको बताए ।

उम्मेदवारी दर्ता गर्न जाने पक्ष र अर्को पक्षबीच घम्साघम्सी हुँदा स्थितिलाई नियन्त्रणमा लिन नेपाल प्रहरी र सशस्त्र प्रहरी बललाई परिचालन गरिएको सिन्धुपाल्चोकका प्रमुख जिल्ला अधिकारी वेदनिधि खनालले बताए ।  झडपका क्रममा नगरपालिकामा पनि तोडफोड भएको छ ।