जसपाबाट वीरगञ्ज महानगरको मेयरमा राजेशमानको मनोनयन दर्ता, जनताको उत्साहजनक उपस्थिति

१२ बैशाख, वीरगञ्ज । वीरगञ्ज महानगरपालिकाको मेयरमा जनता समाजवादी पार्टी (जसपा) बाट राजेशमान सिंहले पनि उम्मेदवारी दर्ता गराएका छन् ।

वीरगञ्जको आदर्शनगर रंगशालाबाट जसपाका केन्द्रीय अध्यक्ष उपेन्द्र यादव, मधेश प्रदेशका मुख्यमन्त्री लालबाबु राउत, पर्सा क्षेत्र नम्बर १ का प्रतिनिधिसभा सदस्य प्रदीप यादवलगायत हजारौँको उपस्थितिमा सिंह जिल्ला समन्वय समितिको कार्यालयमा स्थापित निर्वाचन केन्द्रसम्म पुगेका थिए ।

ब्यानर एवम् छाता चिन्ह र छातासहित हजारौँ नेता तथा कार्यकर्ताहरु जसपाबाट सिंहको मनोनयन दर्ता गर्न उपस्थित थिए । बाजागाजासहित मनोनयन दर्ता गराउन पुगेका सिंहले जनताको उत्साहजनक उपस्थितिले आफु पनि उत्साहित भएको प्रतिक्रिया दिएका छन् । प्रतिगमनविरुद्धको गठबन्धनले विजयी हाँसिल गरेर देखाउने सांसद प्रदीप यादवको दावी छ ।

केन्द्रीय समितिको निर्णयअनुसार पवित्र गठबन्धन भएको हुँदा यसमा कसैले घात नगर्ने र जनताको भलाई तथा वीरगञ्जको बिकासका लागि सबैले ऐक्यबद्धता जनाएको यादवले बताए ।

जनताबाट प्राप्त गरेको साथ, समर्थन र मायाले सँधैभरी निरन्तरता पाइरहने र आगामी दिनमा अँझै जनलहर बढ्ने मेयरका उम्मेदवार सिँहको विश्वास छ ।