उम्मेदवारी फिर्ता गराएर वडासम्म सहमति गराउने प्रयासमा सत्ता गठबन्धन: नेता गुरुङ

१३ वैशाख, काठमाडौं ।  नेकपा माओवादी केन्द्रका प्रमुख सचेतक देवप्रसाद गुरुङले सत्तारुढ दलबाटै परेका बागी उम्मेदवारीलाई मिलाएर वडा तहसम्मै सहमति गरेर जाने विषयमा गठबन्धन प्रयासरत रहेको बताएका छन् । उनले उम्मेदवारी फिर्ता लिने समयभित्रमा बागी उम्मेदवारलाई मनाउने र व्यवस्थापन गर्ने विषयमा अहिले गठबन्धनका शीर्ष नेताहरु जुटिरहेको बताएका छन् ।

संवाद डबलीले मंगलबार काठमाडौंमा आयोजना गरेको कार्यक्रममा गुरुङले सत्तारुढ दलहरुले स्थानीय तह निर्वाचनका लागि आफूखुसी दिएको उम्मेदवारी हटाउन सबै ठाउँमा पहल भइरहेको गरिरहेको बताए । सत्तारुढ दलहरुबीचको सहमतिविपरीत पनि स्थानीय तह निर्वाचनमा उम्मेदवारी मनोनयन भएको र ति फिर्ता हुने गुरुङको भनाई छ ।

उनले मनोनयनमा परेकाहरुबाट पनि सहमतिमै उम्मेदवार कायम गर्न सत्तारुढ दलहरुबीच सहमति हुने र यदि कुनै कारणले नभए पनि प्रतिगमनकारी, संविधान विरोधी शक्तिलाई हाबी हुन नदिन आफूहरु सचेत रहेको बताए । गुरुङले एमालेले प्रतिगमनकारी, पश्चागमनकारी कदम चालेकाले त्यसलाई रोक्न यथास्थितिवादी कांग्रेससँग गठबन्धन बनाउनु परेको तर्कसमेत गरे ।

गुरुङले केपी ओली नेतृत्वको सरकारले साढे ३ वर्षको आफ्नो कार्यकालमा उत्पादनमूलक क्षेत्रमा लगानी नगरेका कारण मुलुकको आर्थिक अवस्था कमजोर बनेको आरोप समेत लगाए ।