कांग्रेस घोषणापत्रको टिप्पणीबारे ओलीलाई महामन्त्री थापाले जवाफ दिने

१४ वैशाख, काठमाडौं ।  नेपाली कांग्रेसको चुनावी घोषणापत्रमा नेकपा एमालेका अध्यक्ष केपी शर्मा ओलीले गरेको टिप्पणी निर्लज्ज र अपमानजनक भएको भन्दै ‘ओली टिप्पणी’को जवाफ कांग्रेसले फर्काउने भएको छ ।

पूर्वप्रधामन्त्रीसमेत रहेका ओलीले दिएको अभिव्यक्ति खेद जनक रहेको भन्दै ओलीले गरेको टिप्पणीबारे कांग्रेसले जवाफ दिने भएको हो ।

नेपाली कांग्रेसका महामन्त्री एवम् निर्वाचन घोषणापत्रका संयोजक गगनकुमार थापाले दिउँसो १ बजे बत्तिसपुतलीमा आयोजित निर्वाचन अभियान सम्बन्धी कार्यक्रममार्फत् जवाफ दिने तयारी गरिएको छ । ओलीले कांग्रेसलाई एमालेको घोषणापत्र चोरेको आरोप पनि लगाएका छन् ।

अनुपम फुडल्याण्डमा ‘स्थानीय तह निर्वाचन अभियान र सम्पर्क समितिहरूको भूमिका’ विषयमा कार्यक्रम आयोजना गरिएको छ । यही कार्यक्रममार्फत् थापाले ओलीको अभिव्यक्तिको जवाफ दिने नेपाली कांग्रेसले जनाएको छ ।

नेकपा एमालेका अध्यक्ष केपी शर्मा ओलीले मंगलबार आयोजित एक सार्वजनिक कार्यक्रममा कांग्रेसको चुनावी घोषणापत्रलाई ‘पागलहरुको प्रलाप’ भनेर आलोचना गरेका थिए ।

मंगलबार नेपाली कांग्रेसका प्रवक्ता डा. प्रकाशशरण महतले एमाले अध्यक्ष ओलीले निर्वाचन आचारसंहिता उल्लंघन गरेको भन्दै निर्वाचन आयोगको ध्यानाकर्षण गराएका थिए ।