चन्द नेतृत्वको नेकपा फुटको संघारमा, बास्तोला र ओलीलाई पदमुक्त गरियो

१४ वैशाख, काठमाडौं ।  नेत्रविक्रम चन्द नेतृत्वको नेपाल कम्युनिष्ट पार्टी (नेकपा) विभाजनको संघारमा पुगेको छ । नेकपाका महासचिव नेत्रविक्रम चन्दले पार्टी सचिवालय सदस्य धर्मेन्द्र बास्तोला र हेमन्त प्रकाश ओलीलाई पदमुक्त गरेपछि नेकपा विभाजन उन्मुख भएको हो ।

चन्दले जारी गरेको विज्ञप्तिमार्फत दुवै जनालाई फुटपरस्त गतिविधि गरेको आरोपमा अनिश्चितकालसम्मका लागि सम्पूर्ण जिम्मेवारीबाट मुक्त गरिएको बताएका छन् ।

बास्तोला र ओलीका गल्तीहरुको प्रकृति हेर्दा उहाँहरु निकै पर पुगिसकेको, विभिन्न बैठक एवम् भेलासमेत गर्दै हिंडेकाले पार्टी विधान अनुसार दुवै जनालाई अनिश्चित समयका लागि सम्पूर्ण जिम्मेवारीबाट मुक्त गरिएको जानकारी गराइन्छ,’ जारी विज्ञप्तिमा भनिएको छ ।

यो कारबाही बाध्यता भएको उल्लेख गर्दै चन्दले विभिन्न तत्वहरुको उक्साहट, अराजकतावादी, अवसरवादी, विचलनवादी गतिविधिका कारण यो निर्णय लिनुपर्ने अवस्था सृजना भएको बताएका छन् ।

सचिवालय सदस्य बास्तोलाले स्थानीय तह निर्वाचनमा उम्मेदवारी दिएकाहरुलाई उम्मेदवारी फिर्ता नलिए कारबाही गर्ने चेतावनीयुक्त वक्तव्य निकालेका थिए । यसपछि थप विवाद चर्किएको थियो ।