देउवाको निर्देशनपछि बागी उम्मेदवारी फिर्ता गराउन गृहमन्त्री खाँण भरतपुरमा

१४ वैशाख, काठमाडौं । चितवनको भरतपुर महानगरपालिकामा गठबन्धन दलको निर्णय नमान्ने भन्दै नेपाली कांग्रेसका नेताबाटै बागी उम्मेदवारी परेपछि त्यसलाई मिलाउन कांग्रेस नेता तथा गृहमन्त्री बालकृष्ण खाँण खटिएका छन् ।

स्थानीय तह निर्वाचनमा भरतपुर महानगरमा कांग्रेस नेता कार्यकर्ताले देखाएको असन्तुष्टि सम्बोधन गर्न  नेपाली कांग्रेस सभापति एवम् प्रधानमन्त्री शेरबहादुर देउवाले खाँणलाई भरतपुर पठाएका हुन् ।

प्रधानमन्त्री देउवाको निर्देशनपछि गृहमन्त्री खाँण बुधबार दिउँसो नै भरतपुर लागेका छन् । भरतपुरमा सत्ता गठबन्धन दलबीच चुनावी तालमेल हुँदा महानगरको मेयर पद नेकपा माओवादी केन्द्रको भागमा परेको छ भने कांग्रेस नेता कार्यकर्ताले त्यसको विरोध गर्दै आएका छन् ।

असन्तुष्ट कार्यकर्ताको तर्फबाट नेता जगन्नाथ पौडेलले स्वतन्त्र उम्मेदवारीसमेत दिइसकेका छन् । देउवाको निर्देशनपछि चितवनमा गठबन्धन बलियो बनाउने गरी भूमिका खेल्न खाँण गएको बताइएको छ । गठबन्धनका लागि भरतपुरको मेयरमा नेकपा माओवादी केन्द्रका तर्फबाट रेणु दाहालले उम्मेदवारी दिएकी छिन् ।

उपमेयर पदमा कांग्रेसका महानगर सभापति चित्रसेन अधिकारीले उम्मेदवारी दिएका छन् । भरतपुरमा यसअघि २०७४ को निर्वाचनमा पनि कांग्रेसले नेकपा माओवादी केन्द्रलाई समर्थन गरेको थियो । बागी उम्मेदवार परेपछि नेकपा माओवादी केन्द्रका अध्यक्ष पुष्पकमल दाहाल मंगलबार दिनभर भरतपुर बसेर फर्किएका थिए ।