एमालेलाई धुलो चटाउने गरी गठबन्धनका उम्मेदवारलाई जिताउँछौँः माधव नेपाल

१५ वैशाख, काठमाडौं ।  नेकपा एकीकृत समाजवादी अध्यक्ष माधकुमार नेपालले स्थानीय तहको निर्वाचनमा एमालेलाई धुलो चटाउने बताएका छन् । गठबन्धाका उम्मेदवारलाई मात्रै मतदान गर्ने गरी उनले वडा तहमा पनि गठबन्धनमा सहमतिको प्रयास भइरहेको जानकारी दिएका छन् ।

काठमाडौंमा बिहीबार आयोजित कार्र्यक्रममा उनले पालिका प्रमुखमा जस्तै वडा तहमा पनि सहमतिको प्रयास भइरहेको जानकारी दिएका हुन् । नेपालले साझा उमेदवारलाई जिताउन कार्यकर्तालाई निर्देशन पनि दिएका छन् । उनले राष्ट्रिय सभा निर्वाचनमै केपी शर्मा ओलीको पार्टीलाई धुलो चटाएको बताए ।

अध्यक्ष नेपालले कांग्रेस, माओवादी केन्द्रसहित गठबन्धन आवद्ध दलका उम्मेदवारलाई पनि निर्वाचित गर्र्न आफ्ना नेता तथा कार्यकर्तालाई आह्वान गरे । बिहीबार गठबन्धनको कार्यदलको बैठक बस्न लागेको जानकारी दिँदै उनले सहमतिका साथ गठबन्धन अघि बढ्ने बताए ।

स्थानीय तहमा गठबन्धनबीच सहमति कायम गरेर उम्मेदवारलाई निर्वाचित गराउने विषयमा छलफल गर्न कार्यदलको बैठक बस्न लागेको भन्दै उनले केही पालिकामा एकीकृत समाजवादीका उम्मेदवार निर्विरोध निर्वाचित भएका जानकारी दिए ।

काठमाडौं । “दुईजना पालिकाका प्रमुख निर्विरोध चयन भइसकेका छन्,” उनले भने, “तीनजना उपप्रमुख निर्विरोध निर्वाचित भइसकेका छन् भने ७ वडाअध्यक्ष र २६ जना सदस्य निर्विरोध निर्वाचित भएका छन् ।”

उनले एमाले उमेदवार रामबहादुर थापा बादललाई राष्ट्रिय सभामा पराजित गरेको स्मरण गरे । “बादललाई पराजित गरेका हौँ राष्ट्रिय सभामै,” उनले भने, “हामीले त्यसपछि विजयीको सुरुवात गरेका हौँ । पछि भएको राष्ट्रिय सभा निर्वाचनमा पाँचजना हाम्रा उमेदवार जिताएका छौँ, केपी ओलीको पार्टीलाई त्यसबेला नै धुलो चटाउने काम गरेका हौँ ।”