निर्वाचनसम्म असन्तुष्टिलाई भित्रै राखेर उम्मेदवारको मुख नहेरी रुख चिह्नमा मतदान गरौँः महामन्त्री शर्मा

१५ वैशाख, काठमाडौं । नेपाली कांग्रेसका महामन्त्री विश्वप्रकाश शर्माले स्थानीय तह निर्वाचनमा कांग्रेसको उम्मेदवारको मुख नहेरी रूखलाई हेरेर मतदान गर्न नेता–कार्यकर्तालाई आग्रह गरेका छन् ।

बिहीबार काठमाडौंमा आयोजित एक भेलालाई सम्बोधन गर्दै शर्माले अहिले सबैमा कुनै न कुनै किसिमो असन्तुष्टि रहेको र त्यसलाई उचित समयमा पार्टीले सम्बोधन गर्ने तर, अहिले कांग्रेसका उम्मेदवारहरूको मुख नहेरी रूख चिह्नमा मतदान गर्न आग्रह गरे ।

व्यक्तिमा असन्तुष्टि भए पनि पार्टीलाई मत दिनुपर्नेमा उनले जोड दिँदै पार्टीलाई व्यवस्थित बनाउनका लागि आफूहरू लागिपरेको भनाई राखे । उनले १० वर्षमा देशलाई बिजुली बेचेर धनी बनाउने कांग्रेसको सपना रहेको बताए ।

एमसीसी परियोजना सफल भएर १० वर्षमा हरेक नेपालीको चुलोमा बिजुलीले खान पकाउन सक्ने अवस्था आउने उल्लेख गरे । काठमाडौंका सडकमा डिजेल र पेट्रोलका गाडीहरूलाई विस्थापित गरेर विद्युतीय गाडी विस्तार गर्न सकिने पनि बताए ।

मतदान गरेर मात्रै पार्टीले नजित्ने भन्दै उनले सही रूपमा मतदान गर्न मतदातलाई सिकाउन र मतदान भइसकेपछि मतगणनामा चनाखो भएर बस्न पनि उनले आग्रह गरे । व्यक्ति जो–जो भए पनि रूख चिह्न लिएर उठेको कांग्रेसको उम्मेदवार भएको उल्लेख गर्दै उनले व्यक्तिमा असन्तुष्टि भए पनि कांग्रेसलाई मत दिनुपर्नेमा जोड दिए ।

महामन्त्री शर्माले नेपाली कांग्रेसलाई मतदान गर्ने मतदाताहरूलाई सुरक्षा दिँदै मतदानस्थलसम्म लैजान युवाहरूलाई निर्देशन दिए । मतदान गरेर मात्रै कांग्रेसले नजित्ने भन्दै उनले सही रूपमा मतदान गर्न मतदातलाई सिकाउन र मतदान भइसकेपछि मत गणनामा चनाखो भएर बस्न पनि उनले आग्रह गरे ।