उमेदवारी फिर्ता गराउन चितवन पुगेका गृहमन्त्रीमाथि आचारसंहिता लाग्यो, कारवाही हुन्छः आयोग

१५, वैशाख, काठमाडौं । नेपाली कांग्रेसका नेता एवं गृहमन्त्री बालकृष्ण खाँणमाथि निर्वाचन आचारसंहित विपरित कार्यको अरोपमा कारवाही हुने भएको छ । निर्वाचन आचारसंहिता विपरित खाँणले चितवनमा गतिविधि गरेको भन्दै निर्वाचन आयोगले त्यसप्रति आफ्नो ध्यानाकर्षण भएको बताएको छ ।

चितवनको भरतपुर महानगरपालिकामा बागी उमेदवारलाई फिर्ता लिन फकाउन चितवन पुगेका गृहमन्त्री बालकृष्ण खाँणको सक्रियतालाई निर्वाचन आयोगले नोटिसमा राखेर यस्तो बताएको हो । आयोगले खाँणसँग स्पष्टीकरण सोध्ने तयारी गरेको छ ।

आयोगका सहायक प्रवक्ता सूर्यप्रसाद अर्यालले आचारसंहिताको विषयमा आयोगले थप निर्णय गर्ने बताए । नियमित पत्रकार सम्मेलनमा उनले पलिब्क पोष्ट र रेसपोन्सिबिलिटीका विषयहरु आउने भएपनि आयोगको आयोगको ध्यानाकर्षण भएकाले यस सम्बन्धमा आयोगले थप निर्णय गर्ने बताए ।

प्रधामन्त्री शेरबहादुर देउवाको निर्देशनमा खाँण चितवनको भरतपुर महानगरपालिकाको मेयरमा बागी उम्मेदवारी दिएका कांग्रेस नेता तथा पूर्वसांसद जगन्नाथ पौडेलको उम्मेदवारी फिर्ता गराउने प्रयासका लागि गएका थिए । उनलाई फकाउन गृहमन्त्री बालकृष्ण खाँण र राज्यमन्त्री उमेश श्रेष्ठ चितवन पुगे पनि पौडेलले उम्मेदवारी फिर्ता नलिने बताएका छन् ।