गभर्नर अधिकारीको मुद्दामा आज सुनुवाई, अन्तरिम आदेशले निरन्तरता पाए अर्थमन्त्रीलाई अर्को संकट

१६ वैशाख, काठमाडौं । सर्वोच्च अदालतले नेपाल राष्ट्र बैंकका गभर्नर महाप्रसाद अधिकारीको पक्षमा यसअघि भएको फैसलालाई निरन्तरता दिए अर्थमन्त्री जनार्दन शर्मा फेरी नैतिक प्रश्नहरुको घेरामा पर्ने भएका छन् ।

गभर्नर अधिकारीले सर्वोच्च अदालतमा दायर गरेको रिट निवेदनमा आज सुनुवाइ हुँदैछ । बिहीबार सुनुवाइ नसकिएकाले ‘हेर्दाहेर्दै’ मा राखिएको रिटको आज फैसला आउने सम्भावन धेरै छ ।

न्यायाधीशहरू सपना प्रधान मल्ल र टङ्कबहादुर मोक्तानको संयुक्त इजलाशमा यही वैशाख १३ गते सुनुवाइ प्रारम्भ भएपनि समय अभावका कारण बिहीबारका लागि तय भएको थियो । तर बिहीबार पनि नभ्याइएकाले आजका लागि हेर्दाहेर्दैमा राखिएको हो ।

गभर्नर अधिकारीले बिना जानकारी र बिना स्पष्टीकरण आफूमाथि छानबिन गर्ने भनेर समिति गठन गरिएको उल्लेख गर्दै उक्त निर्णय खारेज गर्न आदेश माग गर्दै वैशाख ४ गते सर्वोच्च अदालतमा रिट निवेदन दायर गरेका थिए । यही विषयसँग जोडेर अर्थमन्त्री शर्मामाथि नैतिक प्रश्न उठाउँदै राजीनामा समेत मागिएको थयो ।

यसअघि, न्यायाधीश हरिप्रसाद फुयाँलको वैशाख ६ गतेको एकल इजलाशले जाँचबुझ समिति गठन गर्ने सरकारको निर्णय कार्यान्वयन नगर्न अल्पकालीन अन्तरिम आदेश जारी गरेको थियो । सो आदेशलाई निरन्तता दिने वा नदिने भन्ने विषयमा सुनुवाइ भइरहेको छ ।

मन्त्रिपरिषद्को गत चैत २५ गतेको बैठकले गभर्नर अधिकारीमाथि छानबिन गर्न जाँचबुझ समिति गठन गर्ने निर्णय गरेको थियो । जाँचबुझ समिति गठन भएपछि अधिकारी स्वतः निलम्बनमा परेका थिए । तत्कालिन नेपाली कांग्रेसको सरकारका समयमा यही प्रकृतिको मुद्दामा तत्कालिन अर्थमन्त्री महेश आचार्यले राजीनामा दिएका थिए ।