चुनावी अनुगमन समितिको बैठक जारी, गठबन्धनमा आवद्ध दलका बागी उम्मेदवारमाथि गर्ने कारबाहीबारे छलफल

१६ वैशाख, काठमाडौं । सत्ता गठबन्धनको चुनावी तयारी तथा अनुगमन समिति बैठक अहिले प्रधानमन्त्रीको सरकारी निवास बालुवाटरमा जारी छ । बैठकमा स्थानीय तह निर्वाचनमा गठबन्धन दलमा आबद्ध बागी उम्मेदवारले समयभित्रै उम्मेदवारी फिर्ता नलिए गरिने कारवाहीका विषयमा छलफल भइरहेको छ ।

आजको बैठकमा देशभर गठबन्धन विपरित उठेका बागी उमेदवारहरुलाई फिर्ता गराउने विषयमा छलफल गरी निर्णय सार्वजनिक गरिने छ । निर्वाचनका सम्बन्धमा तल्ला तहमा भइरहेको गतिविधिका विषयमा पनि छलफल हुनेछ ।

निर्वाचन आयोगले आज साँझ ५ बजेसम्म उमेदवारी मनोनयन फिर्ताको समय तोकेको छ । उक्त समयभित्र बागीले उम्मेदवारी फिर्ता नलिए बैठकले गरेको निर्णय अनुसारको कारवाही स्वतः लागुहुने बताइएको छ ।

बिहीबारको समितिको बैठकले पनि बागी उमेदवारी फिर्ता गराउन अधिकतम प्रयास गरिने भन्दै समयभित्र उम्मेदवारी फिर्ता लिन भनेको थियो । तर, अहिले सम्म कसैले पनि फिर्ता लिएको जानकारी आएको छैन ।