कांग्रेसका बागीको टिप्पणी, ‘देउवा पार्टीको नीति, सिद्धान्त र बीपीको आदर्शबाट च्युत भए’

१७ वैशाख, काठमाडौं । नेपाली कांग्रेसको केन्द्रीय आग्रहलाई अश्विकार गर्दै चितवनको भरतपुर महानगपालिकाबाट बागी उम्मेदवारी फिर्ता नलिएका कांग्रेस नेता जगन्नाथ पौडेलले पार्टी सभापति शेरबहादुर देउवा सिद्धान्त र नीतिहिन भएको टिप्पणी गरेका छन् ।

उनले सामाजिक सञ्जाल ट्वीटरमाफर्त नेपाली कांग्रेसको मुल्य, मान्यता र आदर्शबाट सभापति देउवा बाहिर गएकाले कांग्रेसको अस्तित्वका लागि पनि आफुले उम्मेदवारी दिएको बतएका छन् । उनले आफ्नो उम्मेदवारी कांग्रेसको उम्मेदवारबिरुद्ध नभएको बताउँदै आएका थिए ।

उनले कांग्रेस सभापतिसमेत रहेका प्रधानमन्त्री शेरबहादुर देउवाप्रति आक्रोश पोख्दै देउवा पार्टीको नीति, सिद्धान्त र बीपीको आदर्शबाट च्युत भएको टिप्पणी पनि गरेका छन् । सामाजिक सञ्जाल ट्वीटरमार्फत उनले भनेका छन्, ‘भरतपुर निवासी कांग्रेसीजन हामी सबै विपीको आदर्श र सिद्धान्तमा अडिग छौं । हाम्रो जीत सत्ताका निमित्त सौदाबाजी गर्ने र आफ्नो नीति र सिद्धान्त तिलाञ्जली दिने नेतृत्वको प्रवृत्तिप्रति गतिलो झापड हुनेछ ।’

देउवाले उनलाई पटक पटक बागी उम्मेदवारी फिर्ता लिन दबाब दिएका थिए । गृहमन्त्री बालकृष्ण खाण र राज्यमन्त्री उमेश श्रेष्ठलाई सम्झाइ बुझाइसहित आश्वासन दिन पौडेलकै घर चितवन पठाए । तर, उनी फकिएनन् । बागी उम्मेदवारी फिर्ता लिएनन् । नलिएपछि उनलाई शुक्रबार नै कांग्रेसले साधारण सदस्यतासमेत नरहने गरी कारबाही गरेको छ ।

देउवाप्रति आक्रोशित हुने अर्का बागी उम्मेदवार हुन् विमल कार्की । पोखरा महानगरपालिकाको प्रमुख पदमा उम्मेदवार बनेका उनले देउवाले कांग्रेसीजनको भावनालाई कदर नगरेर गलत ढंगले निर्वाचनमा तालमेल गरेको बताएका छन् । उनले देउवाले गरेको गल्तीको भागिदार नहुने पनि बताए । बागी उम्मेदवारी फिर्ता नलिएपछि उनी पनि कारबाहीमा परेका छन् ।

सभापति देउवाले बिहीबार बागी उम्मेदवारी फिर्ता लिन अपिल जारी गरेका थिए । अपिलमै उनले फिर्ता नलिए कारबाही गर्ने चेतावनी दिएका थिए । शुक्रबार बिहान पनि पार्टी केन्द्रीय कार्यालयले विज्ञप्ति जारी गर्दै फिर्ता लिन आग्रह गरेको थियो । धेरै ठाउँमा नलिए पनि प्रमुख दुई महानगरपालिकामा बागी उम्मेदवारी दिएका पौडेल र कार्कीले भने नलिएका हुन् ।