गठबन्धनमा सहमति नभएपछि पछि हटे देउवा, वरियता अनुसार आईजीपी बनाउने प्रस्ताव मन्त्रिपरिषदमा

१८ वैशाख, काठमाडौं । नेपाल प्रहरीमा आईजीपी नियुक्तिका लागि प्रधामन्त्री शेरबहादुर देउवाले प्रस्ताव गरेको एआईजीको नाममा गठबन्धनभित्र सहमति नभएपछि वरियता अनुसार आईजीपी नियुक्त गर्ने प्रस्ताव मन्त्रिपरिषदमा लगिएको छ ।

गृहमन्त्रालय स्रोतका अनुसार वरियताक्रममा प्रहरी अतिरिक्त महानिरीक्षक (एआईजी) विश्वराज पोखरेल छन् । उनी पछि क्रमस अरुको नाम राखिँदा धिरजप्रताप सिंह तेस्रो नम्बरमा रहेको बताइएको छ ।

प्रधामन्त्री शेरबहादुर देउवा अझै पनि आफुले चाहेको व्यक्तिलाई आईजीपी बनाउने प्रयासमै रहेपनि प्रहरी प्रमुखमा बढुवा गर्न गृह मन्त्रालयले मन्त्रिपरिषदमा प्रस्ताव पठाई सकेको छ ।

प्रधानमन्त्री देउवाले धिरजप्रताप सिंहलाई आईजीपी बनाउने प्रस्ताव गठबन्धनमा राखेको तर, सहमति नभएपछि गृहमन्त्री बालकृष्ण खाँणलाई बालुवाटार बोलाएर वरियता अनुसार प्रस्ताव ल्याउन निर्देशन दिएको स्रोतको भनाई छ ।

आइतबार बिहान भएको सत्ता गठबन्धनको छलफलमा माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष माधवकुमार नेपालले चुनावका वेला वरियता मिचेर आईजीपी नियुक्त गर्दा विवाद हुन सक्ने भन्दै असहमति जनाएका थिए ।