आजबाट प्रहरी महानिरीक्षक थापासहित १९ प्रहरी उच्च अधिकारीहरुको जागिर सकियो

१७ वैशाख, काठमाडौं । आजदेखि नेपाल प्रहरीका महानिरीक्षक शैलेश थापा क्षेत्रीसहित १९ जना उच्च प्रहरी अधिकारीहरु सेवानिबृत भएर घरजाँदैछन् । २०४९ साल वैशाख १९ गते नेपाल प्रहरीको निरीक्षकमा भर्ना भएका ९८ औं ब्याचका अधिकारीहरु ३० वर्षे सेवा अवधि पूरा गरी घर जान लागेका हुन् ।

३० वर्षे सेवा अवधिका कारण बिदा लिनेमा प्रहरी महानिरीक्षक क्षेत्री, प्रहरी अतिरिक्त महानिरीक्षकहरू हरिबहादुर पाल, प्रधुम्न कार्की, निरजबहादुर शाही र बसन्तकुमार पन्त रहेका छन् । सोही ब्याचका ११ जना प्रहरी नायब महानिरीक्षकहरूले समेत आजैदेअखि अवकाश पाउँदैछन् ।

सेवामा अवधिका कारण अनिवार्य अवकाशमा जाने डिआईजीहरूमा घनश्याम अर्याल, प्रकाशजंग कार्की, गणेशबहादुर ऐर, रामकृपाल साह, प्रकाश अधिकारी, नवराज भट्ट, उमेश रञ्जितकार, देवबहादुर बोहोरा, पुरूषोत्तम कणेल, राजेन्द्र चौधरी रहेका छन् ।

डिआईजी राजेशलाल कर्णले उमेर हदका कारण गत हप्तानै अवकाश लिएका थिए । सोही ब्याचका तीनजना प्रहरी वरिष्ठ उपरीक्षकहरू प्रदिप श्रेष्ठ, वीरेन्द्र वस्याल, नवराज भट्टसमेत आजैदेखि ३० वर्षे सेवा अवधि सकिएर घर जाँदैछन् ।

प्रहरी महानिरीक्षक सहित ठूलो संख्यामा उच्च प्रहरी अधिकारीहरुले अवकाश पाउने भएपछि ति पदहरुमा बढुवाका लागि तयारी पनि थालिएको छ । आईजीपीलगायत एआईजी नियुक्ति भने आजको मन्त्रिपरिषद् बैठकले गर्नेछ ।