सरकारले विधिको शासन विपरित आईजीपी नियुक्ति गर्योः कोइराला

१८ वैशाख, काठमाडौं । नेपाली कांग्रेसका नेता डा.शेखर कोइरालाले नेपाल प्रहरीको महानिरीक्षक नियुक्त गर्दा वरियता र विधि मिचिएको बताएका छन् ।

उनले सरकारले नेपाल प्रहरीको विधि र विधान विपरित नियुक्ति गरी संगठनमा बिवाद निम्त्याउने काम गरेको आरोप लगाएका छन् । नेपाल प्रहरीको महानिरीक्षकमा तेस्रो वरियताका धीरजप्रताप सिंहलाई सरकारले बढुवा गरेपछि कोइरालाले त्यसको विरोध गरेका हुन् ।

‘वरियता र प्रक्रिया मिचेर नेपाल प्रहरीको आईजीपी नियुक्त गर्ने सरकारको निर्णयले विधिको शासनको खिल्ली उडाउने काम गरेको छ’ कोइरालाले ट्विट गर्दै भनेका छन्, ‘सरकारको यो निर्णयले सिंगो प्रहरी संगठनलाई फेरि एकपटक विवादमा ल्याएको छ ।’

निर्वाचनका समयमा सरकारले गरेका निर्णयले जनतामा नराम्रो संन्देश दिएको कोइरालाको भनाई छ । उनले कांग्रेस सभापति समेत रहेका प्रधानमन्त्री देउवाले जहिले पनि प्रहरीमा बिवाद निकालेर अपठ्यारो बनाउने गरेको आरोप पनि लगाएका छन् ।