२३ सिटमा खुम्चिएको कांग्रेसलाई ९३ सिटमा पुर्याउन गठबन्धन गरेको होः वरिष्ठ नेता पौडेल

१८ वैशाख, तनहुँ । नेपाली कांग्रेसका वरिष्ठ नेता रामचन्द्र पौडेलले २३ सिटमा खुम्चिएको कांग्रेसलाई ९३ सिटमा पुर्याउन गठबन्धन गरिएको बताएका छन् । उनले सत्ता गठबन्धनले गरेको चुनावी तालमेल निर्वाचनमा बहुमत ल्याउनका लागि भएकाले सोहीअनुसार काम गर्न र विरोध नगर्न आम कार्यकर्तालाई निर्देशन दिएका छन् ।

आइतबार गृह जिल्ला तनहुँमा नेपाली कांग्रेसको भातृ संगठन नेपाल ट्रेड युनियन कांग्रेसले अन्तराष्ट्रिय श्रमिक दिवसको सन्दर्भमा आयोजना गरेको कार्यक्रमलाई सम्बोधन गर्दै नेता पौडेलले कांग्रेसले गठबन्धन गर्दा सजिलै बहुमत ल्याउने दाबी गरे ।

उनले भने, ‘कांग्रेसले गरेको गठबन्धनलाई अन्यथा नलिनु होला । कांग्रेसले बहुमत ल्याउनलाई गठबन्ध गरेको हो । गठबन्धन गर्दा कांग्रेसलाई फाइदा हुन्छ । अहिले सामान्य कुरालाई लिएर विरोध गर्नु हुँदैन। माथिको निर्देशनको पालना गर्दै हाम्रा उम्मेदवारहरुलाई जिताउने तर्फ लाग्नुपछ । म सबै नेता कार्यकर्तालाई जिताउन अठोटका साथ चुनावमा एक भएर होमिन आग्रह गर्छु ।’

गठबन्धन विरोधी गतिविधिमा लाग्दा प्रतिगमन पक्षधरलाई समर्थन हुने उनको भनाई छ । २३ सिटमा खुम्चिएको कांग्रेसलाई ९३ सिटमा पु¥याउँन गठबन्धनले सघाउने उनले बताए । संविधानको रक्षार्थ गठबन्ध अरिहार्य रहेको नेता पौडेलको भनाइ छ । उनले गठबन्धनलाई बलियो बनाउनेतर्फ लाग्न जिल्लाका नेता कार्यकर्तालाई सुझाव पनि दिए ।

’देशलाई स्थायित्वमा लैजान आवश्यक छ । नेपाली कांग्रेस नेतृत्वमा संविधानको रक्षा भएको छ,’ उनको जिकिर छ । रोजगारी र आम्दानीलाई सार्थक बनाउन तीनै तहको सरकारमा कांग्रेसको नेतृत्व आवश्यक रहेको उनले बताए । तनहुँमा सत्ता गठबन्धन दलको निर्णयअनुसार स्थानीय निर्वाचनका लागि गठबन्धन हुन नसक्नु दुखद भएको पौडेलको भनाई छ ।