नेपाल प्रहरीको आईजीपी नियुक्तिबिरुद्ध एआईजीद्वय पोखरेल र थापाले सर्वोच्चमा दिए निवेदन

१९ वैशाख, काठमाडौं । नेपाल प्रहरीको महानिरीक्षकमा धीरजप्रताप सिंहलाई नियुक्त गरेपछि असन्तुष्ट रहेका प्रहरी अतिरिक्त महानिरीक्षक (एआईजीपी) विश्वराज पोखरेल र सहकुलबहादुर थापा अदालत गएका छन् ।

आईजीपी नियुक्तिमा असन्तुष्ट रहेका एआईजीद्वय विश्वराज पोखरेल र सहकुलबहादुर थापा सर्वोच्च अदालत पुगेर निवेदन दिएका हुन् ।उनीहरूले सर्वोच्च अदालतमा रिट निवेदन पेस गरेका छन् ।

सिंहलाई महानिरीक्षकमा नियुक्त गर्ने निर्णय बदर माग गर्दै सर्वोच्चमा रिट निवेदन दिएका हुन् । रिट निवेदन दर्ताको प्रक्रियामा रहेको छ ।

आइतबार बसेको मन्त्रिपरिषद् बैठकले वरीयता क्रममा तेस्रो नम्बरमा रहेका एआईजी सिंहलाई प्रहरी महानिरीक्षक बनाउने निर्णय गरेको थियो । तर, गृह मन्त्रालयको बढुवा सिफारिस समितिले भने पहिलो नम्बरमा विश्वराज पोखरेललाई सिफारिस गरेको थियो । तर, तेस्रो नम्बरमा रहेका सिंहलाई सरकारले आईजीपीमा बढुवा गरेको थियो ।

यस विषयमा गृह मन्त्रालयले भने स्पष्टीकरण दिइसकेको छ । आईजीपी नियुक्तिमा जेष्ठता मात्र आधार नहुने गृहसचिव टेकनारायण पाण्डेले प्रष्ट पारे । नवनियुक्त आईजीपीलाई दर्ज्यानी चिह्न प्रदान कार्यक्रममा बोल्दै गृहसचिव पाण्डेले नियुक्तिमा ज्येष्ठतालाई मात्र आधार नमानिने  बताएका छन् ।