भारतमा सन् २०२० मा ८१ लाख बढीको मृत्यु

२१ वैशाख एजेन्सी । भारतीय केन्द्रीय स्वास्थ्य मन्त्रालयले तयार पारेको तथ्यांकअनुसार सन् २०२० मा ८१ लाख २ हजार मानिसको मृत्यु भएको छ।

जुन सन् २०१९ को तुलनामा ६.२ प्रतिशत बढी हो। सन् २०१९ मा ७६ लाख ४ हजार मानिसको मृत्यु भएको थियो । जसमध्ये २०२० मा कोरोनाका कारण १ लाख ४८ हजार जनाको मृत्यु भएको थियो भने २०२१ मा यो संख्या ३ लाख ३२ हजार थियो । भारतीय केन्द्रीय स्वास्थ्य मन्त्रालयको तथ्यांक अनुसार हालसम्म देशमा ५ लाख २३ हजार ८८९ जनाको कोरोनाका कारण ज्यान गएको छ ।

महाराष्ट्र, बिहार, गुजरात, पश्चिम बंगाल, आन्ध्र प्रदेश, तमिलनाडु, कर्नाटक, मध्य प्रदेश, राजस्थान, असम र हरियाणा जस्ता राज्यहरू २०१९–२०२० सम्म मृत्युको संख्यामा वृद्धि भएको छ । सन् २०१९ को तुलनामा सन् २०२० मा दर्ता भएका जन्म तथ्यांकमा पनि २.४ प्रतिशतले कमी आएको छ ।

सन् २०१९ मा जन्मेका मानिसको संख्या २ करोड ४८ लाख थियो, जुन २०२० मा घटेर २ करोड ४२ लाख पुगेको छ ।