चितवनका कांग्रेस कार्यकर्ताको भविश्य पार्टीले हेर्छ, चिन्ता लिनु पर्दैनः भण्डारी

२१ वैशाख, चितवन । नेपाली कांग्रेसका नेता शंकर भण्डारीले चितवनका कांग्रेसका नेता–कार्यकर्ताको राजनीतिक भविष्यबारे पार्टीले सोचिरहेको बताएका छन् । उनले निश्चिन्त भएर चितवनका कांग्रेस कार्यकर्तालाई गठबन्धनका उम्मेदवारको पक्षमा लाग्न आग्रह गरेका छन् ।

चितवनमा कांग्रेस भित्र बढेको असन्तुष्टि मिलाउन चितवन आएका केन्द्रीय सदस्य भण्डारीले भरतपुरमा प्रेस युनियनले गरेको पत्रकार सम्मेलनमा बोल्दै भरतपुरलाई केन्द्रबाट विशेष प्राथमिकतामा साथ हेरिएकाले गठबन्धनको पक्षमा लाग्न आग्रह गरेका हुन् ।

भण्डारीले गठबन्धनप्रति कांग्रेस पूर्ण जवाफदेही र जिम्मेवार रहेकाले गठबन्धनको निर्णयमा पालन गर्न र यसको खिलापमा नजान कार्यकर्तालाई आग्रह गरे । उनले भने,‘पार्टीका साथीहरुको योगदान, लगानी, क्षमताको मूल्यांकन भोलिका दिनमा पार्टीले गर्ने नै छ । यो गठबन्धनका कारणले पार्टीका साथीहरुको राजनीतिक लगानी र भविष्यबारे कुनै पनि साथीहरुले चिन्ता लिनुपर्ने अवस्था छैन ।’

भरतपुर महानगरपालिकाको मेयरमा माओवादी केन्द्रबाट रेनु दाहाल र नेपाली कांग्रेसबाट चित्रसेन अधिकारी उपमेयर उम्मेदवार छन् । गठबन्धन गर्दा मेयर माओवादीलाई दिएका भन्दै यहाँका कांग्रेस कार्यकर्ताहरु असन्तुष्ट छन् ।