नेकपाको विद्रोही पक्षले गर्यो चन्द र विश्वकर्मालाई पार्टीबाट निष्कासित गरेको घोषणा

२१ वैशाख, काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) को विद्रोही पक्षले महासचिव चन्दलाई पार्टीबाट निष्कासित गरेको घोषणा गरेको छ । चन्दलाई महासचिव पदबाट मुक्त गर्दै पार्टीको साधारण सदस्य समेत नरहने गरी निष्कासित गरिएको बताइएको छ ।

चितवनको पर्सामा बुधबार सुरु भएको विद्रोही पक्षको राष्ट्रिय भेलाले महासचिवको जिम्मेवारीबाट विप्लवलाई हटाउँदै पार्टीको संयोजकमा धर्मेन्द्र बास्तोलालाई तोकिएको छ । नेता, खड्गबहादुर विश्वकर्मालाई पनि जिम्मेवारीबाट हटाएको छ । उनी यसअघि पार्टीको प्रवक्ता थिए ।

भेलाबाटै नयाँ पार्टी गठन गर्ने तयारी समेत विद्रोही नेताहरुको छ । स्थानीय चुनाव उपयोग गर्ने या नगर्नेबारेमा नेकपामा विवाद सुरु भएर एकअर्कालाई कारवाही गर्नेसम्म पुगेको हो । पार्टीको नीति विपरीत गएको भन्दै विप्लवले नेताहरु धर्मेन्द्र वास्तोला र हेमन्तप्रकाश वलीलाई पार्टीबाटै निष्कासन गरेका थिए ।