भरतपुरमा आज सत्ता गठबन्धनको संयुक्त सभा, प्रधानमन्त्रीसहित प्रमुख नेता सहभागी हुँदै

२२ वैशाख चितवन । सत्तारूढ गठबन्धनले आज चितवनमा चुनावी सभा गर्ने भएको छ । सभामा प्रधानमन्त्री तथा नेपाली कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाललगायतले सम्बोधन गर्नेछन् ।

सभामा कांग्रेस वरिष्ठ नेता रामचन्द्र पौडेल, महामन्त्री गगन थापा, अर्का नेता शेखर कोइरालालगायतले पनि सम्बोधन गर्ने कार्यक्रम छ ।

प्रधानमन्त्री देउवा र कांग्रेस वरिष्ठ नेता रामचन्द्र पौडेल हिजो नै चितवन पुगिसकेका छन्। सभा भरतपुरको हाकिमचोकमा हुनेछ । कांग्रेसका बागी उम्मेदवार जगन्नाथ पौडेलले सत्ता गठबन्धनका उम्मेदवार रेनु दाहाललाई चुनौती दिएका कारण भरतपुर गठबन्धनका लागि प्रतिष्ठाको विषय बनेको छ।

पौडेलको उम्मेदवारी फिर्ता गराउन सत्ता गठबन्धन लागि परे पनि सफल हुन भने सकेन ।