कोभिडले एक करोड ५० लाखको मृत्यु: डब्लूएचओ

२३ वैशाख एजेन्सी । कोरोना भाइरस संक्रमणका कारण विश्वभर करिब एक करोड ५० लाख मानिसको मृत्यु भएको विश्व स्वास्थ्य संगठन डब्लूएचओलेअनुमान गरेको छ।

यो २०२० जनवरी १ देखि २०२१ डिसेम्बर ३१ को बीच मृत्यु हुने संख्याको नयाँ अनुमान हो । हाल विश्वमा कोरोनाबाट ५४ लाखको मात्रै मृत्यु भएको आधिकारिक मानिएको छ। धेरै देशले कोभिडबाट मृत्यु हुनेको संख्या कम देखाएको डब्ल्यूएचओले जनाएको छ । डब्लूएचओले भारतमा मात्रै कोरोनाले ४७ लाख मानिसको मृत्यु भएको उल्लेख गरेको छ। यो संख्या आधिकारिक तथ्यांकभन्दा करिब १० गुणा बढी हो ।

तर, भारत सरकारले यो रिपोर्टमाथि आपत्ति जनाएको छ। भारतको आधिकारिक तथ्यांकअनुसार कोरोनाका कारण मृत्यु हुनेको संख्या पाँच लाख २३ हजार ९७५ पुगेको छ । भारतमा अहिले पनि दैनिक तीन हजारको हाराहारीमा संक्रमण देखिएको छ ।