पाँच दलीय गठबन्धनको केन्द्रीयतामा स्वार्थ देखिनु दुर्भाग्यपूर्ण होः डा. भट्टराई

२३ वैशाख, काठमाडौं । जनता समाजवादी पार्टीका संघीय परिषद्‍ अध्यक्ष डा बाबुराम भट्टराईले पाँच दलीय गठबन्धन केही नेताहरूको स्वार्थ पुरा गर्ने माध्यम बन्नु गलत भएको बताएका छन् ।

उनले समग्र राष्ट्रिय हित र राजनीतिक निकासलाई मुल मार्ग बनाएर अगाडी बढ्नुपर्नेमा नेताको स्वार्थलाई केन्द्रमा राखेर गठबन्धन अगाडी गएको देखिनु दुर्भाग्यपूर्ण भएको बताएका छन् ।

समाजिक सञ्जाल ट्वीटरमार्फत भट्टराईले गठबन्धनले नेपाली कांग्रेसका सभापति तथा प्रधामन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल‘प्रचण्ड’का निजि स्वार्थप्रति मात्रै काम गरिहेको संकेत गरेका छन् ।

उनले गठबन्धनमा रहेका दलभित्रै पनि ठूलो र सानो भन्ने अहम कायमै रहेकोप्रति पनि चिन्ता देखाएका छन् ।

स्थानीय तहको निर्वाचनमा नेपाली कांग्रेस, माओवादी केन्द्र, एकीकृत समाजवादी, जसपा र राष्ट्रिय जनमोर्चाबीच विभिन्‍न पालिकामा तालमेल भएको छ । तर, चुनाव नजिकिँदै जाँदा भट्टराईले संसयपूर्ण अभिव्यक्ति दिएका हुन् ।

’सबैले बुझौं स्थानीय निर्वाचनका मुद्दा फरक हुन्छन् र स्थानीय नेता–कार्यकर्ता त्यसवारे बढी जानकार हुन्छन् ! लोकतन्त्र बलियो पार्ने हो भने केन्द्रीय हस्तक्षेप रोकौं र गैरदलीय चुनाव गरौं१कुनै आकाश खस्दैन,’ उनले ट्वीट गरेका छन् ।