एमालेका कारण कांग्रेसले बाध्यात्मक अवस्थामा सरकारको नेतृत्व गरेको होः महामन्त्री थापा

२३ वैशाख, काठमाडौं । नेपाली कांग्रेसका महामन्त्री गगनकुमार थापाले नेकपा एमालेले पाँच वर्ष सरकार चलाउन नसकेका कारण कांग्रेसले बाध्यात्मक अवस्थामा सरकारको नेतृत्व गर्नुपरेको बताएका छन् ।

उनले एमालेलाई पाँच वर्षका लागि पाएको मत दुरुपयोग गरी सरकार चलाउन नसकेको विषयमा क्षमायाचना नगरी मत माग्ने आधार पनि नभएको बताएका छन् ।

पाँच वर्षका लागि जनमत पाएको पार्टीले सत्ता सञ्चालन गर्न नसकेकै कारण कांग्रेसको नेतृत्वमा सरकार बन्नु बाध्यात्मक अवस्था भएको उनले बताए ।

प्रजातान्त्रिक विचार समाजले शुक्रबार बिहान काठमाडौंमा गरेको कार्यक्रममा उनले भने, ‘पाँच वर्ष सरकार चलाउन सकिन भनी क्षमायाचना नगरी एमालेलाई मत माग्ने अधिकार पनि छैन ।’

एमाले अध्यक्ष केपी शर्मा ओलीले वर्तमान सरकारलाई परमादेशको सरकार भनी आलोचना गरिरहँदा यो अवस्था कसले ल्याएको भनेर उनले प्रश्न गरे । ‘परमादेश सरकार ओलीले भनिरहँदा कांग्रेसले सोध्नै पर्दछ । यो बनाउने काम कसले गरेको हो ?’ थापाले भने, ‘सरकार हाम्रो प्राथमिकतामा थिएन । सरकार चलाउने हामीलाई म्याण्डेट दिइएकै थिएन ।’