आफुले दिएको अभिव्यक्ति छानबिनमा परेपछि प्रचण्डले भने, ‘मेरो भनाइलाई गलत अर्थ लगाइयो’

२५ वैशाख, काठमाडौं । नेकपा माओवादी केन्द्रका अध्यक्ष पुष्पकमल दाहालले भरतपुरमा सत्ता गठबन्धनले नजिते राजनीतिक दुर्घटनाको खतरा छ भन्ने आफ्नो भनाइलाई गलत अर्थ लगाइएको स्पष्ट पार्दै गदा निर्वाचन आयोगले भने उनको अभिव्यक्तिमाथि छानविन सुरु गरेको छ ।

आइतबार पोखरामा पाँच दलीय गठबन्धनको चुनावी सभामा बोल्दै उनले गठबन्धन देशलाई राजनीतिक दुर्घटनाबाट बचाउनको लागि जन्मिएको बताउँदै आफुले कसैलाई पनि धम्कि नदिएको दावी गरेका थिए ।

यता, भरतपुर महानगरपालिकामा रेनु दाहाल निर्वाचित नभए देश दुर्घटनामा जान्छ भन्ने प्रचण्डको अभिव्यक्तिप्रति निर्वाचन आयोगले छानविन थालेको छ ।

प्रचण्डको भनाइबारे प्रमुख प्रतिपक्षी दल एमालेले प्रश्न उठाउनुका साथै उजुरीसमेत परेपछि आयोगले आन्तरिक रुपमा छानविन थालेको हो । दाहालले भरतपुरमा भएको सत्ताधारी गठबन्धनको निर्वाचन सभामा आफ्नी छोरीसमेत रहेकी माओवादी केन्द्रकी उम्मेदवार दाहाल निर्वाचित नभए देश दुर्घटनामा जाने चेतावनी दिएका थिए ।

प्रचण्डले पोखरामा भने, ‘एउटा ठूलो षड्यन्त्रलाई परास्त गर्ने सन्दर्भमा गठबन्धनको विरुद्धमा राजावादी, गणतन्त्र विरोधीहरुको अर्को गठबन्धन जो आएको छ त्यसलाई परास्त गर्न आवश्यक छ,’ उनले भने, ‘अन्यथा देशमा फेरि राजनीतिक दुर्घटनाको खतरा छ । मैले यो कुरा भन्दै गर्दा नेपाली कांग्रेसको नेतृत्वमा रहेको सरकारलाई सफल बनाउन अपिल गर्दै गर्दा कतिपय मानिसले मैले जनता धम्क्यायो, हामीलाई नजिताए दुर्घटना हुन्छ भन्यो भनेर पनि गलत अर्थ लगाइएको छ ।’

देशमा गठबन्धनको संयुक्त सरकारको तरिकाबाट मात्रै देशमा राजनीतिक स्थायित्व कायम गर्ने सम्भावना रहेको उनले उल्लेख गरे । प्रचण्डले यो गठबन्धन जन्मिने दिनदेखि नै प्रतिक्रियावादी र अवसरवादीको लगातारको कोसिस यो गठबन्धनलाई टुटाउने प्रयास गरिरहेको बताए ।

अहिलेको निर्वाचनमा पनि संविधान, राष्ट्र र गणतन्त्रको रक्षाको निम्ति अगाडि बढेको यो गठबन्धनलाई कुनै न कुनै रुपमा विभाजित गर्ने षड्यन्त्र चलिनै राखेको भन्दै स्थानीय निर्वाचनको तहमा मात्रै नभई प्रदेश र संघीय निर्वाचनसम्म पनि गठबन्धनलाई लैजानुपर्ने उनदे बताए ।