एकदिवसीय सिरिजको उपाधिका लागि नेपाल र जिम्बावे ‘ए’ भिड्दै

२६ वैशाख काठमाडौं । तीन खेलको एकदिवसीय सिरिजको अन्तिम खेलमा नेपाली राष्ट्रिय क्रिकेट टिमले आज पाहुना टोली जिम्बावे ’ए’ विरुद्ध प्रतिस्पर्धा गर्दैछ ।

त्रिवि क्रिकेट मैदानमा नेपाल र जिम्बावे ’ए’ बीचको खेल बिहान साढे नौ बजे शुरु हुनेछ। नेपाल सिरिज जित्ने लक्ष्यसहित मैदान उत्रँदैछ । तीन खेलको सिरिज १–१ को स्थितिमा छ। सिरिजको पहिलो खेलमा जिम्बावेले नेपाललाई ३ विकेटले हराएको थियो। दोस्रो खेलमा नेपालले जिम्बावेलाई ९ विकेटले हरायो।

आईसीसी पुरुष क्रिकेट विश्वकप लिग टूअन्तर्गत अमेरिकामा हुने त्रिकोणात्मक एकदिवसीय सिरिजको तयारी स्वरूप नेपालले जिम्बावे ’ए’सँग सिरिज खेलिरहेको हो । एकदिवसीय भन्दा अगाडि भएको तीन खेलको टी–ट्वान्टी सिरिज १–१ को बराबरीमा सकिएको थियो ।