कैलाली पुगेर प्रचण्डले भने, ‘गठबन्धनमा कांग्रेसलाई विश्वास गर्ने आधार छैन्’

२६ वैशाख, धनगढी । नेकपा माओवादी केन्द्रका अध्यक्ष पुष्पकमल दहाल ‘प्रचण्ड’ले कैलाली पुगरे गठबन्धनप्रतिको भनाई फेरेका छन् । उनले गठबन्धनभित्र कांग्रेसबाट धोका हुन सक्ने आशंका व्यक्त गर्दै अब भर गरेर जान नसकिने अवस्था देखिएको बताएका छन् ।

सोमबार बिहान कैलालीको कैलारी गाउँपालिकाको हसुलिया बजारमा भएको चुनावी सभालाई सम्बोधन गर्दै अध्यक्ष प्रचण्डले गठबन्धन दलभित्रको सहमतिविपरीत कांग्रेसले उम्मेदवारी दिन लगाएर धोका दिएको बताए । उनले कांग्रेससँग धेरै स्थानमा गठबन्धन प्रष्ट नभएको बताए ।
उनले अन्य क्षेत्रमा जस्तै कांग्रेसले यहाँ पनि गठबन्धनको सहमतिविपरीत उम्मेदवारी दिएको भन्दै त्यसलाई खारेज नगर्ने हो भने हामी एक्लै चुनाव लड्नुपर्ने अवस्थामा हाम्रोतर्फबाट उपाध्यक्ष पदमा परेको उम्मेदवारलाई जिताउनुपने बताए ।

कैलारी गाउँपालिकामा गठबन्धनको सहमति माओवादीलाई अध्यक्ष र उपाध्यक्षमा कांग्रेसलाई उम्मेदवार बनाउने भन्ने थियो । तर‚ सहमति बन्नुअगावै कांग्रेसबाट टिकट पाइसकेका रामसमज चौधरीले अध्यक्ष पदमा उम्मेदवारी दिए । पार्टीले प्राविधिक कारणले उनको उम्मेदवारी रद्द गराउन सकेको छैन् ।

कांग्रेसको उम्मेदवारीपछि उपाध्यक्षमा माओवादीकी लक्ष्मी सत्वगौवा चौधरीले पनि उम्मेदवारी दिएकी छन् । उनले पनि अहिलेसम्म उम्मेदवारी फिर्ता लिएकी छैनन् । माओवादीले पनि गठबन्धनको सहमतिविपरीत सत्गौवा चौधरीका लागि मत मागिरहेकोप्रति लक्षित गर्दै प्रचण्डले हाम्रो उम्मेदवारले जित्नुपर्ने बताए ।