स्थानीय तहको चुनावमा बदर मत बढ्ने परिवेक्षण समितिको ठहर

२७ बैशाख, काठमाडौं । आम निर्वाचन परिवेक्षण समितिले दलहरूबीच चुनावी तालमेल भएका कारण बदर मतको संख्या बढ्ने निष्कर्ष निकालेको छ । मंगलबार काठमाडौंमा पत्रकार सम्मेलन गर्दै सार्वजनिक गरिएको समितिको प्रतिवेदनमा तालमेलबारे मतदाता जानकार नहुँदा उमेदवार नभएको ठाउँमा मतदान हुन सक्ने उल्लेख छ ।

समितिले मतपत्र बदर हुन नदिनेतिर त्यति चासो पुगेको नदेखिँएको, दुई वा दुईभन्दा बढी दलहरूबीच तालमेल गरी उमेदवारी दिइएको र मतदातामा तालमेलबारे जानकारी नहुँदा उमेदवार नभएको ठाउँमा मतदान हुन सक्ने र त्यसले बदर मतको संख्या बढाउन सक्ने प्रतिवेदनमा जनाएको छ ।

मतपत्रमा कसरी चिह्न लगाउनुपर्छ भन्ने जानकारी मतदातालाई नहुँदा मतपत्र बदर हुन सक्ने सम्भावना पनि औँल्याइएको छ । राजनीतिक दलहरूले पनि मतपत्र बदर नहुने गरी मतदान गर्न सिकाउनुपर्ने भए पनि त्यसतर्फ ध्यान नपुगेको समितिको ठहर छ । मतदाता शिक्षा पर्याप्त नदिइँदा योपटक बदर मतको संख्या बढ्न सक्ने प्रतिवेदनमा उल्लेख छ ।

प्रतिवेदनमा सहर–बजारका केही क्षेत्रमा नमुना मतपत्रमा ‘मक इलक्सेन’ गराएको देखिएको र गाउँ–ठाउँमा त्यसरी नै मतदान केन्द्रबाटै मतदातालाई नमुना मतपत्र देखाउँदै प्रशिक्षित गर्ने भनाइ मतदान अधिकृतहरूको रहेको उल्लेख छ ।