मताधिकारको प्रयोग गरी लोकतान्त्रिक शासनको संस्थागत विकासमा योगदान पुर्याउन प्रधानमन्त्री देउवाको अपिल

२९ वैशाख, काठमाडौं । प्रधानमन्त्री एवं नेपाली कांग्रेसका सभापति शेरबहादुर देउवाले स्थानीय तहको निर्वाचनमा निर्धक्कसँग मतदान गर्न अपिल गरेका छन् ।

उनले शुक्रबार (वैशाख ३० गते) हुन गइरहेको स्थानीय तहको निर्वाचनमा निर्धक्कसँग मतदान गरी आफ्नो मताधिकारको प्रयोग गर्न सम्पूर्ण देशबासीमा अपील गरेका हुन् ।

बिहीबार एक अपिल जारी गर्दै प्रधानमन्त्री देउवाले निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न सरकारले सम्पूर्ण व्यवस्थापनलाई चुस्तदुरुस्त बनाएको उल्लेख गरेका छन् ।

स्थानीय तहदेखि नै लोकतान्त्रिक अभ्यासमा सहभागी भई लोकतान्त्रिक शासन पद्धतीको संस्थागत विकासमा योगदान पुर्याउन प्रधानमन्त्री देउवाले सबैमा आग्रह पनि गरेका छन् ।

वि.सं. २०७४ को स्थानीय तहको निर्वाचन गराउँदा पनि देउवा नै देशको प्रधानमन्त्री थिए । नयाँ संविधान जारी भएपछि मधेसमा उत्पन्न उत्पन्न असन्तुष्टिलाई सम्बोधन गर्दै उनले तीन चरणमा स्थानीय तहको निर्वाचन गराएका थिए । यस वर्ष एकै चरणमा भोलि शुक्रबार ७५३ स्थानीय तहको निर्वाचन हुँदैछ ।

उनले अपिलमा भनेका छन्, ’बालिग मताधिकार तपाईं हाम्रो संवैधानिक अधिकार र लोकतन्त्रको आधारस्तम्भ हो । स्थानीय तहदेखि नै लोकतान्त्रिक अभ्यासमा सहभागी भई लोकतान्त्रिक शासन पद्धतिको संस्थागत विकासमा योगदान पुर्याउन म सबैमा आग्रह गर्दछु ।’