स्याङजाको तर्ले मतदान केन्द्रबाट ८४ बर्षिय अपाङ्गता भएका जेष्ठ नागरिक ढाल बहादुरद्वारा पहिलो मतदान

३० बैशाख, स्याङजा । स्थानीय तहको निर्वाचन अन्तर्गत आज भएको मतदानमा स्याङजाको चैतन्य भवानी आधारभूत प्रा वि विरुवा ८ तर्लेको मतदान केन्द्रबाट ८४ बर्षिय अपाङ्गता भएका जेष्ठ नागरिक ढाल बहादुर रानाले पहिलो मतदान गरेका छन् ।

उनले मतदान गरेपछि मतदान प्रक्रिया सुरु भएको नेपालबहस डटकमका प्रधान सम्पादक पत्रकार इन्द्रबहादुर रिजालले नेपालबहस डटकमलाई जानकारी दिए ।

उक्त मतदान केन्द्रमा अहिले शान्तीपूर्ण रुपले मतदान जारी छ भने जिल्लाका अन्य मतदान केन्द्रमा पनि शान्तीपूर्ण रुपले मतदान भइरहेको रिजालले बताए ।

आगामी पाँच वर्षका लागि स्थानीय तहमा जनप्रतिनिधि चुन्न आज मतदान भइरहेको छ । देशैभर मतदान सुरु भएको निर्वाचन आयोगले जानकारी दिएको छ । मतदान साँझ ५ बजेसम्म जारी हुनेछन ।

६ महानगरपालिका, ११ उपमहानगरपालिका, २७६ नगरपालिका र ४६० गाउँपालिका गरी ७५३ स्ठानीय तह र ६७४३ वडाका ३५ हजार २२१ जनप्रतिनिधि चयन गर्न आज मतदान हुँदैछ । कपिलवस्तुको महाराजगंज नगरपालिका र दाङको तुलसीपुर उपमहानगरपालिकाको एक वडासहित केही ठाउँमा भने आज मतदान हुनेछैन ।