विहान ११ बजेसम्ममा देशभरमा २७ प्रतिशत मत खस्यो: निर्वाचन आयोग

३० बैशाख, काठमाडौं । स्थानीय तह निर्वाचनअन्तर्गत आज मतदान भइरहेको छ । बिहान ७ बजेदेखि देशभर भइरहेको मतदानमा २७ प्रतिशत मत खसेको निर्वाचन आयोगले जनाएको छ ।

बिहान करिब सवा ११ बजेसम्म २७ प्रतिशत हाराहारीमा मत खसेको निर्वाचन आयोगका प्रवक्ता शालिग्राम शर्मा पौडेलले जानकारी दिए । उनले लगभग २७ प्रतिशत मत खसेको रिपोर्ट आएको उनले नेपालबहसलाई बताए ।

बेलुकी ५ बजेसम्म मतदानको समय निर्धारण गरिएको छ । निर्वाचनमा कुल एक करोड ७७ लाख ३३ हजार ७२३ मतदाता छन् । ८७ लाख ४१ हजार ५३० महिला मतदाता, ८९ लाख ९२ हजार १० पुरुष र १८३ जना अन्य मतदाता छन् ।

मतदानका लागि देशभर १० हजार ७५६ मतदानस्थल र २१ हजार ९५५ वटा मतदान केन्द्र तोकिएको छ । विभिन्न मतदान केन्द्रमा भएका दोहोरो झडपका कारण कतिपय स्थानमा मतदान स्थगित गरिएको छ ।