कंचनपुरमा तीन पालिकाको टुंगाे

३ जेठ, महेन्द्रनगर । कंचनपुरका नौ पालिकामध्ये स्थानीय तहको निर्वाचनमा नेपाली कांग्रेस, नेकपा माओवादी केन्द्र र नेकपा एमालेले एक÷एक पालिकामा जित निकालेका छन् । यहाँको लालझाडी गाउँपालिकाको अध्यक्षमा नेकपा एमालेका निर्मल राना निर्वाचित भएका छन् ।प्रतिस्पर्धी नेकपा माओवादी केन्द्रका मदनसेन बडायकलाई एक हजार ६५८ मतान्तरले पराजित गर्दै एमालेका राना निर्वाचित भएका छन् । निर्वाचित रानाले चार हजार ५१६ मत ल्याएका थिए भने बडायकले दुई हजार ८५८ मत प्राप्त गरेका थिए । यसअघिको निर्वाचनमा माओवादी केन्द्रबाट बडायक गाउँपालिकाको अध्यक्ष पदमा निर्वाचित भएका थिए ।

त्यसैगरी गाउँपालिकाको उपाध्यक्षमा नेकपा एमालेकै उम्मेदवार सपना चौधरी राना निर्वाचित भएका छन् । उनले कांग्रेसका राधा रानालाई पराजित गर्दै उपाध्यक्ष पद सुरक्षित गरे । यसैगरी यहाँको बेल्डाडी गाउँपालिकामा कांग्रेसबाट उम्मेदवार रहेका हरिचन्द्र राना अध्यक्ष पदमा निर्वाचित भएका छन् भने उपाध्यक्षमा कांग्रेसकै शान्तिनाथ निर्वाचित भएका छन् ।

अध्यक्ष पदमा निर्वाचित राना कांग्रेसका उपसभापतिसमेत हुन् । उनले चार हजार २०१ मत ल्याएका छन् भने उनका प्रतिस्पर्धी एमालेका उम्मेदवार अक्कलबहादुर विष्टले दुई हजार ३०१ मत प्राप्त गरेका छन् । सो पालिकामा यसअघिको निर्वाचनमा एमालेका उम्मेदवार विजयी भएका छन् । त्यसैगरी यहाँको दक्षिण क्षेत्रमा पर्ने बेलौरी नगरपालिकामा माओवादीका उम्मेदवार पोतिलाल चौधरी दोस्रो पटक नगरप्रमुख पदमा निर्वाचित भएका छन् । २०७४ सालको स्थानीय तहको निर्वाचनमा चौधरी पहिलो पटक बेलौरी नगरपालिकाको नेतृत्वमा पुग्नु भएको थियो ।

नगरप्रमुखमा चौधरीले ८ हजार ७८७ मत प्राप्त गर्नुभएको छ भने उनका निकटत्म प्रतिस्पर्धी एमालेका उम्मेदवार कमला बोहराले ६ हजार ८०३ मत प्राप्त गरेका छन् । बेलौरी नगरपालिकाको उपप्रमुखमा भने एमालेका जोगराम चौधरी सात हजार ५८३ मतसहित निर्वाचित भएका छन् । त्यसैगरी यहाँको भीमदत्त नगरपालिका, बेदकोट र कृष्णपुर नगरपालिकामा कांग्रेसले अग्रता लिएको छ भने दोधारा चाँदनी र शुक्लाफाँटा नगरपालिकामा एमालेका उम्मेदवार जारी मतगणनामा अग्रता लिइरहेका छन् ।