कागेश्वरी मनोहरामा कांग्रेसका उपेन्द्र कार्की ८९६ मतान्तरले अघि

३ जेठ,काठमाडौँ ।  कागेश्वरी मनोहरा नगरपालिकाको नगर प्रमुख पदमा नेपाली कांग्रेसका उपेन्द्र कार्की ८९६ मतान्तरले अघि लागेका छन्। कार्कीले पाँच हजार ५६५ मत पाएका छन् । उनलाई पछ्याउँदै नेकपा (एमाले) का रामशरण ढुंगानाले चार हजार ६६९ मत ल्याउनुभएको निर्वाचन अधिकृत शारदा राउतले राससलाई जानकारी दिए । नगर प्रमुख पदमा नेकपा (एकीकृत समाजवादी) का कृष्णहरि थापाले एक हजार ४६७ मत पाएका छन् । थापा विसं २०७४ को स्थानीय तह निर्वाचनमा एमालेका तर्फबाट नगर प्रमुख निर्वाचित भएका थिए । एमाले फुटेपछि उनी समाजवादीमा लागेका हुुन् । नगर प्रमुखमा राष्ट्रिय प्रजातन्त्र पार्टी (राप्रपा) का राजु फुयाँलले ४२४ मत पाएका छन् ।

यसैगरी उपप्रमुखमा एमालेका शान्ता थापाले पाँच हजार ४७७ मतका साथ अग्रता कायम गरेका छन् । उनलाई पछ्याउँदै नेकपा (माओवादी केन्द्र) का भोला चापागाईंले तीन हजार १०० मत पाएका छन् । समाजवादीका सरस्वती नेपालले ९०० मतका साथ पछ्याइरहैका छन् । नगर उपप्रमुख राप्रपाका उम्मेदवारले ७५० मत पाएका छन् ।

नगरपालिकाको वडा नं २, ८ र ९ मा कांग्रेसले जितेको छ । वडा नं १ मा एमालेले विजयी हासिल गरेको छ । हाल वडा नंं ३ र ७ को मतगणना भइरहेको निर्वाचन अधिकृत राउतले सुनाए । दुई वडाको मत परिणाम आउन बेलुकीसम्म लाग्ने नगर निर्वाचन कार्यालयले जनाएको छ ।

मतगणनास्थल बढाउन मानेनन दलले

नगरपालिकामा दुई स्थानमा मात्र मतगणना भइरहेको छ । धेरै स्थानमा मतगणना गर्न कार्यालयले छलफल चलाए पनि दलका प्रतिनिधिले नमानेको निर्वाचन अधिकृत राउतले बताउनुभयो । नगरपालिकामा अझै वडा नं ४, ५ र ६ को मतगणना सुरु भएको छैन । नगरपालिकामा कूल ३५ हजार ४९३ मतदाता छन् । जसमध्ये २६ हजार ९२८ मत खसेको थियो । यो कूल मतदाता सङ्ख्याको ७६ प्रतिशत भएको नगर निर्वाचन अधिकृतको कार्यालयले जनाएको छ । विसं २०७४ को स्थानीय तह निर्वाचनमा नगरपालिकामा एमाले विजयी भएको थियो । सो निर्वाचनमा एमालेले छ वटा वडामा वडा अध्यक्षसहित नगर उपप्रमुख पदमा पनि विजयी भएको थियो । कांग्रेसले तीन वटा वडामा जितेको थियो ।