आजदेखि राष्ट्र बैंकले १० प्रतिशत व्याजदरमा १० अर्बको विकास ऋणपत्र बिक्री गर्दै

५ जेठ, काठमाडौं । नेपाल राष्ट्र बैंकले बिहीबारदेखि १० अर्ब रुपैयाँ बराबरको विकास ऋणपत्र बिक्री गर्ने तयारी गरेको छ । राष्ट्र बैंकका अनुसार विकास ऋणपत्र २०८१ ‘ङ’ नाम दिइएको उक्त ऋणपत्रको परिपक्व अवधि २ वर्ष रहेको छ ।

जेठ र असार महिनाभित्र १ खर्ब भन्दा बढी आन्तरिक ऋण संकलन गर्ने राष्ट्र बैंकको योजना छ । यहीअनुसार बिहीबारदेखि १० अर्ब रुपैयाँको विकास ऋणपत्र बिक्री गर्न लागिएको हो ।

ऋणपत्र नेपाली नागरिक, बैंक तथा वित्तीय संस्था, बिमा कम्पनी र अन्य संगठित संस्थाले खरिद गर्न पाउँने बताइएको छ । ऋणपत्र घटीमा ५० हजार रुपैयाँ र बढीमा कुल निस्कासन रकमको सीमामा नबढाई ५० हजारले भाग गर्दा निःशेष भागजाने अंकमा हुनुपर्ने बैंकले जनाएको छ ।

जेठ ५ मा बोलकबोल संकलन गरेर ६ गते ऋणपत्र निस्कासन गरिने राष्ट्र बैंकले जनाएको छ । यो ऋणपत्र धितो राखेर ऋण लिन र दिन पाइन्छ भने ६ महिनामा ब्याजदर भुक्तानी पाइँनेछ । ऋणपत्र खरिदका लागि अनलाइनबाटै आवेदन दिन सकिने बताइएको छ ।