११ औँ पटकमा पराजित भए ललितपुरका ८१ वर्षीय व्यञ्जनकार

५ जेठ, काठमाडौं । २०२९ सालदेखि हुँदै आएका स्थानीय निर्वाचनमा सधै विजयी हुँदै आएका ललितपुर महानगरपालिका वडा नम्बर १० का उम्मेदवार नरसिंह व्यञ्जनकार ११ औँ पटकको प्रतिस्पर्धामा आफ्नै भजितबाट पराजित भएका छन् ।

२०७९ को स्थानीय तह निर्वाचनमा ११ औं पटक वडा अध्यक्ष पदमा उनी स्वतन्त्र रुपमा प्रतिस्पर्धामा उत्रिएका थिए । तर उनी यसपटक भने आफ्नै भतिज रविनमान व्यञ्जनकारसँग २८२ मत अन्तरले पराजित भए ।

८१ वर्षीय नरसिंहले ५४३ मत पाउँदा उनका ४४ वर्षीय भतिज रविनमानले ८२५ मत ल्याउँदै वडा अध्यक्ष पद जिते । रविनमान नेपाली कांग्रेसका उम्मेदवार हुन् । स्वतन्त्र रुपमा चुनाव लडेका नरसिंहले पुतली चुनाव चिह्न पाएका थिए ।

नरसिंह २०२९ सालमा पहिलो पटक वडाध्यक्ष बनेका थिए । त्यतिबेला उनले दरबार निकट मानिने देवेन्द्रलाल अमात्यलाई हराएका थिए । त्यसयता ललितपुर महानगरपालिका वडा नम्बर १० को नेतृत्व उनले नै गर्दै आएका थिए ।

बहुदल आएपछिको पहिलो स्थानीय चुनावमा उनी नेपाली कांग्रेसको तर्फबाट निर्विरोध भएका थिए । २०७४ को स्थानीय चुनावमा पनि उनी स्वतन्त्र रूपमा नै चुनाव जितेका थिए ।