धरान उपमहानगरमा केन्द्रको हस्तक्षेप, हस्ताक्षर नभएका मतपत्र रद्द गर्न निर्देशन

५ जेठ, काठमाडौं । सुनसरीको धरान उपमहानगरपालिकाको विवादीत मतगणनामा निर्वाचन आयोगले केन्द्रबाटै हस्तक्षेप गरेको छ । आयोगले धरान उपमहानगरका मतदान अधिकृतलाई विभागिय कारवाही गर्दै हस्ताक्षर नभएका मतपत्र रद्ध गरी मतगणना कार्य अगाडी बढाउन निर्देशन दिएको छ ।

धरान उपमहानगरपालिकामा हस्ताक्षर नगरिएको मतपत्र भेटिएपछि त्यसलाई सदर मान्ने अथवा बदर गर्ने भन्ने विवादका कारण बुधबार दिउँसो २ बजेदेखि मतगणना नै स्थगित भएको थियो । आयोगले हस्ताक्षर नगरिएको मतपत्र बदर हुनेभन्दै त्यस्तो मतपत्र भेटिएका स्थानका मतदान अधिकारीलाई विभागीय कारबाही हुने निर्णय पनि गरेको जनाएको छ ।
आयोगको यो निर्णयपछि धरानमा मतगणनाको लागि अहिले सर्वदलीय बैठक बसिरहेको बताइएको छ । जारी मतगणनाका क्रममा वडा नम्बर २० का १८ वटा मतपत्रमा मतदान अधिकृतको हस्ताक्षर नभेटिएपछि माओवादी केन्द्रका कार्यकर्ताले विरोध जनाउँदै मतगणना स्थल पब्लिक स्कुलमा तोडफोड गरेका थिए ।