सर्वोच्चबाट श्रेष्ठले मुद्दा फिर्ता लिएपछि नबिल र एनबी बैंकबीच मर्जरको बाटो खुल्यो

५ जेठ, काठमाडौं ।  नेपाल बंगलादेश बैंकका संस्थापक लक्ष्मीबहादुर श्रेष्ठले मर्जरबिरुद्ध सर्वाेच्च अदालतमा दिएको   मुद्दा फिर्ता लिएका छन् । उक्त मुद्दाको रिटलाई सर्वोच्चले बुधबार सुनुवाइमा राखेपनि सम्बन्धित पक्षका वकिल उपस्थित नभएपछि स्थगित भएको थियो ।

एनबी बैंकका पूर्व सञ्चालक श्रेष्ठले उक्त मुद्दा सहमतिमै अदालतबाट फिर्ता लिएको बताएका छन् । श्रेष्ठले नेपालको वित्तीय क्षेत्रको माग र बैंकको भविश्यलाई हेरेर आफुले सर्वोच्चमा दिएको मुद्दा फिर्ता लिएको बताएका छन् ।

उनले मुद्दा फिर्ता लिएपछि नबिल बैंक र नेपाल बंगलादेश (एनबि) बैंकबीचको बिगमर्जर प्रक्रिया अब सहज रुपमा अगाडी बढ्ने भएको छ । मर्जर रोक्न श्रेष्ठ आफैले सर्वोच्चमा रिट दिएका थिए । तर, सर्वोच्चको संयुक्त इजलासमा सुनुवाइ हुन सकेको थिएन ।

यसअघि सर्वोच्चको एकल इजलाशले मर्जर जेजस्तो अवस्थामा छ त्यहीँ राख्नु भन्ने आदेश दिएको थियो । मुद्दामाथि सुनुवाई हुने भएपछि सर्वोच्चले दुवै पक्षलाई बोलाएको थियो । सञ्चालक श्रेष्ठले दिवेश्वरी इन्भेष्टमेन्ट प्रालि र नेपाल पावर डेभलपमेन्ट एण्ड इन्भेष्टमेन्ट कम्पनीका तर्फबाट छुट्टाछुट्टै रिट हालेका थिए ।

उनले सर्वोच्चमा हालेको दुबै रिट फिर्ता लिएको बताएका छन् । दुवै संस्थालाई मर्जरका लागि राष्ट्र बैंकले सैद्धान्ति स्वीकृति दिइसकेको छ । अन्तिम स्वीकृति लिनुअघि दुवैले विशेष साधारणसभा डाकेका छन् । एनबी बैंकमा बंगलादेशी साझेदार आइएफआइसी बैंक ढाकाको ४०.८९ प्रतिशत शेयर छ । श्रेष्ठले अब मर्जर प्रक्रिया अगाडी बढ्ने बताएका छन् ।