मत गन्न बाँकी छँदै भानु नगरपालिकामा विजयी घोषित भए कांग्रेसका उम्मेदवार

५ जेठ, तनहुँ । गन्न बाँकी रहेको दुई वडामा खसेको सबै मत विपक्षमा जाँदा पनि नजित्ने अवस्था देखिएकपछि मतगणना बाँकी छँदै तनहुँको भानु नगरपालिकाको प्रमुख तथा उपप्रमुख दुवै पदमा नेपाली काँग्रेसका उम्मेदवारलाई विजयी घोषित गरिएको छ ।

उक्त नगरपालिकामा रहेका अधिकांश वडामा काँग्रेसले नै जित निकालेको छ । वडा नम्बर ६ र ८ को मतगणना बाँकी छँदै नगरपालिका प्रमुखमा आनन्दराज त्रिपाठी र उपप्रमुखमा उमा गोतामे विजयी भएको घोषणा गरिएको हो ।

काँग्रेसका उम्मेदवार त्रिपाठीले १० हजार ९३७ मत प्राप्त गरेका छन् । भानुको ८ र ६ को मत गन्न बाँकी छँदै एमालेका प्रतिष्पर्धी सीताराम बजगाईंभन्दा तीन हजार तीन सय मतले त्रिपाठी अगाडि भएपछि विजयी भएका हुन् ।

एमालेका बजगाईंले सात हजार ६४९ मत पाएका छन् । नगर उपप्रमुख पदमा पनि कांग्रेसकी उमा गोतामेले नौ हजार तीन सय ५३ मत पाउँदा निकटतम प्रतिष्पर्धी स्वतन्त्र उम्मेदवार केशरबहादुर गुरुङले चार हजार ८६७ मत पाएका छन् ।

गन्न बाँकी रहेको मत भन्दा प्रमुख र उपप्रमुख दुवैको मतान्तर बढी भएकाले जितका लागि यतिनै पर्याप्त रहेको बताइएको छ ।