टेलिकम भन्छ, ‘फोरजी सेवा प्रयोग गर्ने ग्राहकको संख्या एक करोडमाथि पुग्यो’

८ जेठ, काठमाडौं । नेपाल टेलिकमले आफ्ना फोरजी सेवाका ग्राहकको संख्या १ करोडभन्दा माथि पुगेको जनाएको छ । उसले कम्पनीमा मोबाइल सेवा प्रयोगकर्ता २ करोड २० लाख ९१ हजार ७ सय ८५ रहेकोमा बाँकी २१ लाख ८७ हजार २ सय २९ टूजी प्रविधिका रहेको जनाएको छ ।

टेलिकमले २०७८ चैतसम्ममा फोरजी ग्राहक १ करोड ४ लाख २१ हजार ९ सय ७६ पुगेको र यस अवधिमा कम्पनीका थ्रीजी ग्राहक ९४ लाख ८२ हजार ५ सय ८० रहेको बताएको छ ।

२०७८ फागुनमा फोरजी ग्राहक आधार ९८ लाख ९३ हजार ८ सय ७४ र थ्रीजी ग्राहक आधार ९९ लाख ४३ हजार ७ सय २९ थियो । टेलिकमले नेपालमै पहिलो पटक २०७३ पुस १७ बाट काठमाडौं र पोखराबाट सुरु गरेको फोरजी/एलटीई सेवालाई २०७६ असोज १५ देखि अत्याधुनिक प्रविधिमा अपग्रेड गरी देशभर विस्तार गर्दै आएको छ ।

टेलिकमद्वारा जारी विज्ञप्तिमा हाल उपलब्ध गराइरहेको फोरजी डाटा सेवामार्फत अधिकतम फाइदा लिन १८०० तथा ८०० मेगाहर्ज दुवै ब्यान्डमा चल्ने मोबाइल सेट प्रयोग गर्नु आवश्यक हुने जनाएको छ ।

मोबाइल इन्टरनेटको क्षेत्रमा एलटीई भनिने फोरजी प्रविधि मोबाइलमार्फत उच्च गतिको इन्टरनेटका साथै उच्च गुणस्तरको भ्वाइस कल सेवा पनि उपयोग गर्न सकिने अत्याधुनिक प्रविधि भएको र यसबाट तीव्र गतिको इन्टरनेट प्राप्त हुने भएकाले गुणस्तरीय श्रव्यदृश्य सामग्री, गेमलगायत बढी ब्यान्डविथ आवश्यक हुने सामग्रीहरू सजिलै प्रयोग गर्न सकिने विज्ञप्तीमा उल्लेख छ ।