शोधनान्तर घाटा यही अवस्थामा रहँदासम्म बैंकिङ प्रणालीमा तरलता सहज हुँदैन्ः गभर्नर अधिकारी

८ जेठ, काठमाडौं । नेपाल राष्ट्र बैंकका गभर्नर महाप्रसाद अधिकारीले नेपालको अर्थतन्त्रका सूचकहरु सकारात्म नरहेको बताएका छन् । उनले सबै क्षेत्रको पहलबाट मात्रै नेपालको अर्थतन्त्रलाई लिगमा ल्याउन सकिने दावी पनि गरेका छन् ।
आइतबार नेपाल उद्योग वाणिज्य महासंघले आयोजना गरेको आर्थिक स्थायित्व विषयक कार्यक्रममा गभर्नर अधिकारीले अर्थतन्त्रको दिशा निर्देश गर्ने सूचकहरु त्यति सकारात्मक नदेखिएको भन्दै यसमा सबै क्षेत्रले सर्तक भएर काम गर्नुपर्ने अवस्ता रहेको बताए ।

सबै क्षेत्र सजग भएर अगाडि बढे अन्यत्रको जस्तो समस्यामा नेपाल नपर्ने भन्दै शोधनान्तर घाटा यही अवस्थामा रहँदासम्म बैंकिङ प्रणालीमा तरलता सहज नहुने ठोकुवा गरे । अधिकारीले आयातको कारण नै तरलताको समस्या देखिएको कारण बताए ।

उनले भने,‘आन्तरिक कर्जा विस्तार भएर तरलतामा खासै समस्या आउँदैन । समस्या ठूलो स्रोत आयातको लागि बाहिर जानु हो । जहिलेसम्म्म भुक्तानी सन्तुलन यसैगरी घाटामा रहन्छ, तबसम्म समस्या रहन्छ । आयातको रेमिट्यान्सले ४० प्रतिशत धान्ने अवस्था रहँदासम्म समस्या रहन्छ । यो समस्याको समाधान हामी सबैले गर्ने हो ।’

अधिकारीले चालु आर्थिक वर्षको नौ महिनामा २६९ अर्ब रुपैयाँ शोधनान्तर घाटा भएको बताए । राष्ट्र बैंकले पुसयता सतर्क रहनुपर्छ भनेर सोहीअनुसार काम गर्दै आएको भन्दै उनले पुसयता लिएका नीतिले केही काम गरेपनि एउटा नीतिले मात्र सबै काम नगर्ने र अब समग्र अर्थतन्त्रलाई प्राथमिकतामा राखेर काम गर्ने बताए ।

उनले नौ महिनामा दुई अर्ब ३८ करोड डलर रिजर्भबाट प्रयोग भइसको र एकै वर्ष यति धेरै रिजर्भ प्रयोग गर्नु संवेदनशील विषय भएको बताउँदै नौ अर्बमध्ये वर्षमा तीन अर्ब सिध्याउन नमिल्ने बताए । यसमा सबैको सहयोग चाहिने र सबैको सहयोग भयो भने सजिलै पार पाउन सकिने धारणा राखे ।

कोभिड–१९ को बेलामा राष्ट्र बैंकले सक्रिय भएर व्यवसाय गर्न सहयोग गरेकाले अहिलेको समस्या आएको भन्दै अब निजी क्षेत्रको साथ चाहिने र अब अर्थतन्त्र समस्यामा पर्दा निजी क्षेत्रले साथ दिनुपर्ने उनको भनाइ छ ।