नगरप्रमुखकाे पहिलाे निर्णय : सुत्केरीलाई निःशुल्क एम्बुलेन्स सेवा

१० जेठ , कञ्चनपुर ।  बेलौरी नगरपालिकाका नवनिर्वाचित नगरप्रमुख पोतिलाल चौधरीले सुत्केरीलाई निःशुल्क एम्बुलेन्स सेवा प्रदान गर्ने पहिलो  निर्णय गरेका छन् । पदभार ग्रहण गर्दै चौधरीले नगरपालिका क्षेत्रभित्र बसोबास गर्ने सुत्केरीलाई आकस्मिक अवस्थामा एम्बुलेन्स सेवा निःशुल्क रूपमा प्रदान गर्ने  निर्णय गरेका हुन् ।

सुत्केरीलाई घरदेखि नगरपालिकाअन्तर्गत रहेका स्वास्थ्य केन्द्र, सेती प्रादेशिक अस्पताल तथा महाकाली प्रादेशिक अस्पतालसम्म पुरयाउनका लागि निःशुल्क रूपमा एम्बुलेन्स उपलब्ध गराउने निर्णय गरिएको नवनिर्वाचित नगरप्रमुख चौधरीले बताए ।

चौधरी दोस्रो कार्यकालका लागि नगरप्रमुख पदमा निर्वाचित भएका हुन् । उनले शिक्षा, स्वास्थ्य, कृषि, बजार व्यवस्थापनका कार्यलाई तदारुकताका साथ अगाडि बढाइने बताएका छन् । “पहिलो कार्यकालमा अधुरा रहेका योजनालाई पूर्णता दिन्छौँ ,” उनले भने, “नगर गौरवका नयाँ योजना कार्यान्वयनमा ल्याउन योजनाबद्ध रूपमा काम गरिनेछ ।”