खानीमा हिरा फेला पारेपछि सहरमा घर किन्ने सपना

११ जेठ, एजेन्सी । भारत मध्यप्रदेशको पन्ना जिल्लाको एउटा गाउँकी एक महिलाले खानीमा २ दशमलव ०८ क्यारेटको हिरा फेला पारेकी छिन् । उक्त हिरा राम्रो गुणस्तरको भएकाले लिलामीमा १० लाख भारु पुग्न सक्ने भारतीय अधिकारीहरूले जनाएका छन् ।

महिलाका श्रीमानले हिराको लिलामीबाट राम्रो मूल्य पाएमा पन्ना सहरमा घर किन्न चाहेको बताए । उनी पेसाले किसान हुन् ।

जिल्लाको कृष्ण कल्याणपुर पाटी क्षेत्रमा भाडामा लिएको खानीमा गृहिणी चमेली बाईले २ दशमलव ०८ क्यारेटको हिरा फेला पारेको पन्नाको हिरा कार्यालयका अधिकारी अनुपम सिंहले बताए । ती महिलाले मंगलबार हिरा कार्यालयमा उक्त बहुमूल्य ढुंगा डिपोजिट गरेको अधिकारीले बताए ।