राष्ट्र बैंकको सञ्चालकमा विपक्षीलाई पनि भाग, विज्ञभन्दा आफन्तमै सरकारले दियो जोड

११ जेठ, काठमाडौं । सरकारले नेपाल राष्ट्र बैंकको सञ्चालक सदस्य नियुक्तिमा पनि भागबण्डा गरेको छ । नेपाली कांग्रेसको नेतृत्वमा सरकार भएपनि सत्ता गठबन्धनबाट नेकपा माओवादी निकट र विपक्षी दलबाट नेकपा एमालेका अध्यक्ष केपी शर्मा ओली निकट मानिएका पूर्वडेपुटी गभर्नरी गरी दुइ जनालाई नियुक्त गरेको हो ।

सिफारिस समितिले नेपाली कांग्रेस, नेकपा माओवादी र नेकपा एमाले समर्थक तीन जनालाई राष्ट्र बैंकको सञ्चालकमा नियुक्तिका लागि सिफारिस गरेको थियो । सञ्चालक समितिमा बाहिरका विज्ञलाई प्राथमिकता दिने भनिए पनि बाहिरबाट एक जनामात्रै सिफारिसमा परेका थिए ।

सिफरिसमा नेपाली कांग्रेसका नेता आनन्दप्रसाद ढुंगानाका भाई दीलिप ढुंगाना, एमाले अध्यक्ष ओली निकट मानिएका पूर्वडेपुटी गभर्नर चिन्तामणी शिवाकोटी र नेकपा माओवादी निकट राष्ट्र बैंककै पूर्वकार्यकारी निर्देशक डा. शंकरप्रसाद आचार्यको नाम सिफारिस गरेको थियो ।

मंगलबारको मन्त्रिपरिषद बैठकले राष्ट्र बैंकको सञ्चालकमा डा. शंकरप्रसाद आचार्य र चिन्तामणि शिवाकोटीलाई नियुक्त गरेको हो ।शिवाकोटी राष्ट्र बैंकका पूर्व डेपुटी गभर्नर हुन् भने आचार्य राष्ट्र बैंककै पूर्वकार्यकारी निर्देशक हुन् । राष्ट्र बैंक सञ्चालक सदस्य डा. श्रीराम पौडेल र रामजी रेग्मीको पदावधि सकिएपछि एक महिना अघि देखि ती पद रिक्त थिए ।

सिफारिसमा परेका ढुंगाना लेखापरीक्षण व्यवसायसँग सम्बन्धित रहेको बताइएको छ । उनको योग्यता नपुगेकाले नियुक्ति नगरिएको बताइन्छ । नियुक्तिको विषयलाई लिएर कांग्रेसभित्र भने असन्तुष्टि देखिएको छ । सरकारको नेतृत्वमा रहेर पनि प्रधानमन्त्री शेरबहादुर देउवाले दीर्घकालीन प्रभाव पार्ने यस्ता नियुक्तिमा ध्यान नदिएको कांग्रेस नेताहरुको भनाई छ ।

यसअघि नेपाल टेलिकमको प्रबन्ध निर्देशक नियुक्तिमा पनि ठूलो रकम लिएर विवादित व्यक्तिलाई नियुक्त गरेको भन्दै विवाद आएको थियो । सरकारले नेपाल टेलिकमको प्रबन्ध निर्देशकमा ओली सरकारकै पालामा बदनामी कमाएका सुनिल पौडेललाई ४० कराेडकाे चलखेलमा नियुक्त गरेको थियो ।